«Պարո՛ն նախագահ, բայց դուք մի կարևոր բան ասեցիք, որ ձեր նախագահության 10 տարիների ընթացքում որևէ հարկատեսակ չի փոխվել, այսինքն ոնց եղել ա, էդքան մնացել ա։ Ես մի հատ պարզ օրինակ եմ ուզում բերել, որ մեր քաղաքացիները նաև տեսնեն, թե ինչ են անում այս իշխանությունները և ինչ են անում հենց իրենց հետ։ Խոսքը գույքահարկի շեշտակի բարձրացման մասին է։ Որ լավ պատկերացնեն մեր քաղաքացիները, կոնկրետ օրինակով եմ ուզում բերել։ Արաբկիրում 700 քառակուսի մետր հող է, որից 100-ը տունն է, բայց այդ սեփականությունը մարդը ունի 47 թվականից, հետո իհարկե սեփականաշնորհում է եղել, և մարդը ընդամենը մի քանի տարի առաջ էդ տան համար և հողի համար, որը չի վերակառուցվել, չի դառել գերշքեղ առանձնատուն, վճարել է 22000 դրամ գույքահարկ։ Այս տարվա գույքահարկը գիտե՞ք ինչքան է։ 560 000 դրամ, 22000 դրամից դարձել է 560 000 դրամ։ Խոսքը շքեղ առանձնատան մասին չի։ Մարդիկ սովորական միջին աշխատավարձ ստացող մարդիկ են։ Հիմա այս քաղաքացիներին էր չէ՞ կարծեմ առաջարկում, ասում էր՝ ձեր տունը վարձով տվեք կամ վաճառեք, գնացեք չգիտեմ որտեղ ապրեք: Հիմա այս քաղաքացիները ի՞նչ պետք է անեն ըստ էության»,- այս մասին «Մեծ քաղաքականություն» փոդքաստի 6-րդ թողարկման ժամանակ ասաց ԱԺ «Հայաստան» խմբակցության պատգամավոր Ագնեսա Խամոյանը:
ՀՀ երկրորդ նախագահ Ռոբերտ Քոչարյանըպատասխանեց այս դիտարկմանը․
«Միայն դա չի, իմիջիայլոց, ավելացել: Այդ տուգանքները, տուգանքի մատերիալ սարքելը եթե համեմատենք, թե օրինակ իմ ժամանակահատվածում տուգանքները ինչ տոկոս էին կազմում կամ աբսոլյուտ թվերով վերցնենք, ուղղակի համեմատության եզրեր չկան: Այն, ինչ արեցին, արտահայտում է իրենց վերաբերմունքը այդ պարզ քաղաքացիների նկատմամբ: Մի կարկառուն դեմքերից մեկի հայրը հայտնի բան ասեց, չէ՞, ասեց օպել քշող համբալներ: Ես կարծում եմ միայն այդ վերաբերմունքի շրջանակներում են կարող մարդկանց խորհուրդ տալ՝ տունդ վարձով տուր, գնա մեկ ուրիշ տեղ ապրի: Մարդ սաղ կյանքը այդտեղ է ապրել։ Լավ, դուք մարդկային որևէ բան չունե՞ք։
Գույքահարկի այս չափը լուրջ խփում է և վտանգ է ստեղծում այսօրվա շինարարության ծավալների համար։ Դրա հետևանքները շատ ծանր են լինելու։ Ի՞նչ է այսօր կատարվում։ Շինարարության մի զգալի մասը և հիպոտեկից երբ օգտվում են, մի զգալի մասը, հատկապես եկամտահարկի վերադարձի հատվածը, ինվեստիցիոն ձեռքբերում է բնակարանի։ Այսինքն, ոչ թե մարդիկ առնում են իրենց բնակարանային պայմանները լավացնելու համար, գնում են որպես ներդրումային բնակարան և մտածում են՝ հետո վարձով կտան այդ բնակարանը: Մի զգալի կտորը այդպիսինն է: Երբ որ դու գույքահարկը մեծացնում ես, դու պրոբլեմ ես ստեղծում։ Այդ գույքահարկի մեծացված տարբերությունը, պիտի մտնի վարձի գնի մեջ: Եվ քանի որ շուկայում նաև առաջարկն է մեծանում և այդ առաջարկը այն գլխից քո կապիտալ ներդրման ծավալն է մեծանում, ինքը մեծ պրոբլեմներ է լինելու։ Մարդիկ այլևս նման կարգի ներդրումների մեջ չեն մտնելու, չեն ֆինանսավորելու»։
Մանրամասն՝ տեսանյութում։
