«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Պատկերացրեք մի երկրի ղեկավար, ով իր ամբողջ պաշտոնավարման ընթացքում զբաղվում է միկրոմենեջմենտով, գիտի՝ ինչպես ամրացնել ցնցուղը, ինչքան պետք է փչել բասկետբոլի գնդակը, ինչպես պետք է դնել աղամանը սեղանին, ինչ անել տան սերվանդում դրված չօգտագործվող սպասքի հետ և այսպես շարունակ։
Բայց ՈւՇԱԴՐՈւԹՅՈւՆ, նույն այդ ղեկավարը պատերազմի, ռազմական դրության ժամանակ տեղյակ չէ, թե ով է շրջանառության մեջ դրել «Հաղթելու ենք» կարգախոսը։
Ենթադրենք, որ այդ ղեկավարը երբեք աչքի չի ընկել ստախոսությամբ, և մենք ոչ մի հիմք չունենք չհավատալու, և այս դեպքում մարդը իսկապես տեղյակ չի եղել։ Այսինքն՝ «Հաղթելու ենք»-ը շրջանառության մեջ է դրվել անկախ Ալենի, Նիկոլի, Լուլույի, Արծրունիի (կամ Ձեր նախընտրած այլ անձանց) կամքից։
Այժմ հարց․ հնարավո՞ր էր արդյոք, որ նման որակներ ունեցող մարդկանց գլխավորությամբ մենք ունենայինք հաջողություն պատերազմում, երբ նրանք անգամ չեն կարողանում վերահսկել հասարակության ոգին բարձրացնող կամ զգոնություն ներշնչող պարզ բաներ։
Իմ կարծիքով նման բան միայն մի դեպքում էր հնարավոր, եթե Ադրբեջանի ղեկավարությունն էլ լիներ նույնքան անպատասխանատու, որքան մերը…
Հ.Գ
Ի դեպ, պարտվողական կարգախոսից խոսող մարդը, 2020 թվականի սեպտեմբերի 27-ին, ԱԺ ամբիոնից հայտարարում էր, որ ինչ էլ լինի, իրենք իրենց պարտված չեն համարի»:
