Ազգային ժողովում կառավարության հետ հարցուպատասխանի ժամանակ՝ հոկտեմբերի 7-ին, էկոնոմիկայի նախարար Գևորգ Պապոյանը հայտարարել էր․
«Հայաստանի ամբողջ գյուղմթերքը կամ մթերված է, կամ արտահանված է, կամ տեղական շուկայում իրացված է»։
Սակայն ընդամենը երկու օր անց՝ հոկտեմբերի 9-ին, Վերին Դվինի բնակիչները բողոքի ակցիա են իրականացրել՝ ահազանգելով լոլիկի իրացման լուրջ խնդիրների մասին։
Գյուղացիների խոսքով՝ արտադրանքը չի վաճառվում, արտահանման հնարավորությունները սահմանափակվել են, իսկ մթերողները թելադրում են ցածր գներ։
Ստեղծված իրավիճակում գյուղացիները կանգնել են լուրջ ֆինանսական խնդիրների առաջ․ բերքը մնում է դաշտերում, իսկ ոռոգման և աշխատուժի ծախսերը գերազանցում են հնարավոր եկամուտը։
Փաստորեն, մինչդեռ նախարարն ԱԺ ամբիոնից հայտարարում էր, թե գյուղմթերքն ամբողջությամբ իրացվել է, գյուղացիները երկու օր անց փողոց էին դուրս եկել՝ չկարողանալով վաճառել իրենց բերքը։
Հարց է առաջանում՝ ի՞նչ նպատակ էր հետապնդում Գևորգ Պապոյանը՝ ներկայացնելով իրականությանը հակասող պատկեր։ Ո՞ւմից են փորձում թաքցնել տնտեսության մեջ առաջացած խնդիրներն ու ճգնաժամը, եթե դրանց հետևանքներն ամեն օր զգում են հենց քաղաքացիները։
