Արթուր Չախոյանը ֆեյսբուքյան իր էջում գրում է․
Օրեր առաջ Տիգրան Ավինյանը հայտարարել էր, որ այո, մանկապարտեզի հետ կապված խնդիր կա, և մենք ճիշտ ենք ասում, որ խնդիր կա։ Նա նշեց նաև, որ մանկապարտեզների մասով հարուցվել է քրեական գործ։ Սակայն այդ հայտարարությունից ընդամենը մի քանի օր անց, նա հայտարարեց, թե կոռուպցիա չկա։ Նրա այս իրարամերժ հայտարարությունները պարզապես ծիծաղելի են։
Արձանագրում ենք շատ կարևոր փաստ. նոր «բարեկարգված», բայց արդեն քանդվող մանկապարտեզների շուրջ բարձրացված հանրային մեծ աղմուկի ֆոնին Տիգրան Ավինյանը և մի շարք բարձրաստիճան պաշտոնյաներ, իրենց թալանի աթոռին գամված մնալու համար, սկսում են սուտ խոսել՝ հակասելով իրենց իսկ նախորդ հայտարարություններին՝ փորձելով հանրային դժգոհությունը մեղմել։
Երբ պաշտոնյան հարկադրված սուտ է խոսում՝ իր իսկ նախորդ խոսքերին հակասելով, դա նշանակում է միայն մեկ բան, մենք ճիշտ ուղու վրա ենք։ Ճշմարտությունը նրանց ստիպում է ստել։
Այսինքն՝ օրեր առաջ կոռուպցիա կար, իսկ հիմա՝ կոռուպցիան պարզապես «անհետացավ»՞։ Բա եթե կոռուպցիա չկա, ապա ինչու մանկապարտեզները երկու տարի է չեն գործում, և ինչու է քրեական գործ հարուցվել։
Նշեմ, որ թիվ 105 մանկապարտեզի շինարարը «Լիլանարմ» ՍՊԸ-ն է, որի տնօրենը ՔՊ-ական Նարեկ Պոզոյանն է՝ Երևանի ավագանու ցուցակում ընդգրկված։ Իսկ այդ քանդվող, փլվող, անորակ աշխատանքների համար քաղաքապետարանը վճարել է 222 միլիոն դրամ։ Սա այն դեպքում, երբ նախկինում հայտարարում էին, թե իբր որևէ գումար չի վճարվել։
Իսկ թիվ 137 մանկապարտեզի շինարարը «Էկո Բիլդինգ» ՍՊԸ-ն է, որի ղեկավարը Արամ Սարգսյանի կուսակից Կառլեն Մինասյանն է։ Այդ մանկապարտեզի շինարարության համար քաղաքապետարանը վճարել է 226 միլիոն դրամ, այսինքն՝ նախատեսված գումարի մոտ 90 տոկոսը արդեն վճարված է այդ «բարեկարգման» աշխատանքների համար։
Նշեմ, որ վերոնշյալ մանկապարտեզները վաղուց պետք է շահագործման հանձնված լինեին, բայց ինչպես տեսնում եք՝ ո՛չ փողը կա, ո՛չ էլ մանկապարտեզներն։
Հիմա արդեն պարզ է դառնում, չէ՞, թե ինչու է Տիգրան Ավինյանը հակասում իր իսկ նախորդ հայտարարությանը և ասում, որ կոռուպցիա չկա՝ որովհետև խոսքը գնում է իրենց կուսակիցների ընկերությունների մասին։
