Ընտրությունների արդյունքում արձանագրված երկու կարևոր փաստի հետ Նիկոլ Փաշինյանը որևէ կերպ չի ուզում հաշվի նստել և համակերպվել։

Առաջինը՝ չնայած աննախադեպ, լայնածավալ արտաքին աջակցության կամ, տվյալ դեպքում, միջամտության, չնայած պետական վարչական ռեսուրսի աննախադեպ կիրառման և բազմաթիվ ապօրինությունների՝ Նիկոլ Փաշինյանը չկարողացավ ստանալ մեր ժողովրդի ձայների 50%-ը։

Երկրորդ հանգամանքը՝ չնայած աննախադեպ բռնաճնշումների, ապօրինությունների, ընտրակեղծիքների, ֆիզիկական և տեղեկատվական տեռորի՝ ընդդիմությունը կարողացավ, առնվազն խորհրդարանական շեմը հաղթահարող ուժերով, արձանագրել շուրջ 550,000 քվե։

Հիմա այս փաստի հետ Փաշինյանը փորձում է չհամակերպվել և հայտարարում է, որ ընդդիմության ձայները կեղծված են, և ընդդիմությունը լեգիտիմ չէ՝ այդ ձայները ձեռք է բերել ընտրակաշառքով։

Ուրեմն լսի՛ր, Նիկոլ Փաշինյան․ այս երկրում եթե կա մի ընտրակեղծարար՝ դա դու ես։ Եթե կա մի ոչ լեգիտիմ սուբյեկտ՝ դա դու ես և քո քաղաքական թիմը։ Հետևաբար, ուզես թե չուզես, այս փաստի հետ հաշվի ես նստելու։

Իսկ ընդհանրապես, սիրելի ժողովուրդ, այս ձեռագիրը նույնն է, բան չի փոխվել իրենց մոտ․ Արցախը հանձնել՝ ասել, որ նախկիններն են արել, կեղծել ընտրությունները՝ մեղքը բարդել ընդդիմության վրա։

Եվ այս ամենի իմաստը ո՞րն է։ Շարունակ խուսափել պատասխանատվությունից, շարունակ մեղքը բարդել ուրիշների վրա։

Ինչո՞ւ է այս պահին նաև սահմանից SMS ուղարկվում իրենց հանցագործ ռեժիմի աջակիցներին, որ բոլորը հայտարարեն, թե ընդդիմության ստացած քվեն կեղծված է։ Մի նպատակով՝ որպեսզի ապալեգիտիմացվի ընդդիմությունը, և դրանից հետո այն բոլոր հանցագործությունները, բռնաճնշումները և ապօրինությունները ընդդիմության և ընդդիմադիր քաղաքական ուժերի նկատմամբ համարվեն արդարացված։

Բայց չի ստացվելու․ այս ճանապարհով որևէ արդյունքի չեք հասնելու։ Ուզեք թե չուզեք, դուք հաշվի եք նստելու մեր ժողովրդի մեծամասնության կարծիքի հետ։ Իսկ մեծամասնությունը ձեր օգտին չէ, առնվազն մեծամասնությունը ձեզ չի քվեարկել, և չնայած այդքան ճնշումների ու «հանցագործությունների», կես միլիոնից ավելի մարդ քվեարկել է ընդդիմության օգտին։