Դեմ չենք, որ արտատարածաշրջանային պետությունները հարաբերություններ զարգացնեն Հարավային Կովկասի երկրների հետ, բայց դա չպետք է ուղղված լինի տարածաշրջանում լարվածության ստեղծմանը։ Այս մասին Երևանում ԱԳ նախարար Արարատ Միրզոյանի հետ մամուլի ասուլիսում հայտարարեց ՌԴ ԱԳ նախարար Սերգեյ Լավրովը:
«Մենք համոզված ենք, որ Հարավային Կովկասում ծագող խնդիրները պետք է լուծվեն նախևառաջ այստեղ գտնվող երկրների և մերձակա հարևանների կողմից: Որևէ կերպ դեմ չենք, որ արտատարածաշրջանային պետությունները, ինչպես որ նախատեսված է գործող համաշխարհային պրակտիկայում, իրենց հարաբերությունները զարգացնեն այստեղ տեղակայված երկրների հետ՝ այն ընկալմամբ, որ նման համագործակցությունն ուղղված չլինի տարածաշրջանում լարվածության ստեղծմանը կամ այստեղ գտնվող երկրների շահերի արհամարհմանը, աշխարհաքաղաքական խաղերին: Դա ոչ մի լավ բանի չի հանգեցնի», — ասաց Լավրովը:
Նրա խոսքով՝ ՌԴ-ի դիրքորոշումը հետևյալն է՝ Մոսկվան պատրաստ է համագործակցել բոլորի հետ, ովքեր պատրաստ են դա անել ազնվորեն, առանց թաքցված օրակարգերի:
Լավրովը նաև հայտնեց, որ զգալի ներուժ է տեսնում «3+3» ձևաչափի զարգացման մեջ։ Արդեն կայացել են նախարարական 2 հանդիպում Թեհրանում և Ստամբուլում։ Առաջին երկուսի արդյունքներով որոշակի լավատեսություն կա հարթակի ապագայի վերաբերյալ, որն ունի բոլոր նախադրյալները՝ դառնալու տարածաշրջանում խաղաղության և կայունության ամրապնդման, տնտեսական, տրանսպորտային կապերի և հարուստ մշակութային ավանդույթների հենարան։
Հաջորդ հանդիպումները ցանկանում են հյուրընկալել Հայաստանը և Ադրբեջանը։
«Նրանք կարող են պայմանավորվել միմյանց հետ, որպեսզի հաջորդ երկու միջոցառումները տեղի ունենան Հայաստանի և Ադրբեջանի մայրաքաղաքներում», — նշեց ՌԴ արտգործնախարարը։
Մանրամասն՝ տեսանյութում։
