Հայաստանի փոխվարչապետ, Ադրբեջանի հետ սահմանազատման հանձնաժողովի համանախագահ Մհեր Գրիգորյանի գրասենյակն անվավեր է համարում Ադրբեջանի ԱԳ նախարար Ջեյհուն Բայրամովի այն հայտարարությունը, ըստ որի Հայաստանի հետ հարաբերությունների գործընթացն ավարտելու համար մեր երկրում պետք է ընդունվի նոր Սահմանադրություն։ Գրում է 24news.am-ը:
Հիշեցնենք, որ մեկնաբանելով սահմանազատման գործընթացը, Բայրամովը տառացիորեն ասել էր հետևյալը.
«Ադրբեջանն ու Հայաստանը հյուսիսից հարավ կիրականացնեն սահմանազատման աշխատանքները։ Կողմերը համաձայնության են եկել սահմանազատման աշխատանքները սյսեկ այն կետից, որտեղ հատվում են Ադրբեջանի, Հայաստանի և Վրաստանի սահմանները։ Գործընթացն ավարտելու համար Հայաստանում պետք է ընդունվի նոր Սահմանադրություն։ Դրա ժամանակն ու ժամկետները Հայաստանի ներքին գործընթացն են։ Մենք կսպասենք այս գործընթացի լիարժեք ավարտին և խաղաղության պայմանագրի վերջնական ստորագրմանը»։
Այս առթիվ 24News-ը գրավոր հարցում էր ուղարկել փոխվարչապետ Գրիգորյանի գրասենյակ՝ խնդրելով մեկնաբանել Հայաստանում նոր Սահմանադրության ընդունման և սահմանազատման միջև եղած կապը, ինչին ի պատասխան ստացել ենք հետևյալ պատասխանը. «Աշխատակարգի համաձայն՝ Հանձնաժողովներով ներկայացված պետությունների պաշտոնատար անձանց ցանկացած պաշտոնական հղում նիստերի և համատեղ աշխատանքային հանդիպումների փաստաթղթերին պետք է սահմանափակվի ԶԼՄ-ների համար համաձայնեցված և հաստատված հաղորդագրության բացառապես բառացի բովանդակությամբ, իսկ ցանկացած պաշտոնական հղում նիստերի և համատեղ աշխատանքային հանդիպումների արդյունքներին, որը դուրս է ԶԼՄ-ների համար հաղորդագրությունների բառացի բովանդակությունից, ինչպես նաև դրանց պարզաբանումները կամ մեկնաբանությունները չեն թույլատրվում և համարվում են անվավեր»։
Մյուս հարցին, թե երբ վերջապես սահմանազատման աշխատանքները կհասնեն Հայաստանի օկուպացված տարածքներին, փոխվարչապետի գրասենյակը չի պատասխանել։
