Տեսել եք, չէ՞, որ մայիսի 28-ին զորահանդես է նախատեսվում իրականացնել։ Զորահանդեսները, զորավարժությունները շատ լավ բաներ են։ Ո՞րն է վատը։
Վատն այն է, որ մեզ փորձում են խաբել։ Ինչպե՞ս են փորձում խաբել․ փորձում են համոզել, թե այդ զորահանդեսով, օրինակ, ապահովված է մեր անվտանգությունը, և լուծված են մեր անվտանգային խնդիրները։
Բայց ո՞րն է այստեղ սուտը։ Սուտն այն է, որ արդեն ութ տարի մեզ դա տարբեր ձևերով են ասել։ Հիշում եք այն ՍՈւ-երը, որոնց գնման համար ծախսվել է շուրջ 220 միլիոն դոլար։ Ի՞նչ եք կարծում՝ դրանք կարողացա՞ն մեզ համար անվտանգային խնդիր լուծել։ Ոչ։
Պատերազմի ընթացքում դրանք որևէ դերակատարություն չկարողացան ունենալ, որովհետև պարզվեց՝ ՍՈւ-երը գնվել են առանց հրթիռների։ Դրանք օգտագործվեցին միայն Նիկոլ Փաշինյանի սելֆիների համար։ Այսինքն՝ զենքը գնվել էր կիսատ, և այն չկարողացավ որևէ խնդիր լուծել, բայց Նիկոլ Փաշինյանը 220 միլիոն դոլարանոց «նկար» ունեցավ և որոշ ժամանակով խաբեց հասարակության մի հատվածին։
Հիշու՞մ եք Դավիթ Տոնոյանի հայտարարությունը, որ նոր պատերազմի դեպքում մենք ոչ թե տարածքներ ենք կորցնելու, այլ նոր տարածքներ ենք նվաճելու։ Ռազմահայրենասիրական հայտարարություն էր, որը, վստահ եմ, որոշ ժամանակ խաբեց հասարակության մի հատվածին։
Ի՞նչ եղավ հետո՝ բոլորս տեսանք, բոլորս հիշում ենք։
Հիշու՞մ եք նաև Արայիկ Հարությունյանի՝ Հ1-ի եթերում հնչեցրած հայտարարությունը, որ Արցախի օդը նախկինում պաշտպանված չէր, իսկ իր օրոք արդեն պաշտպանված է։ Ի՞նչ եղավ հետո՝ նույնպես տեսանք, բոլորս հիշում ենք։
Բայց այդ հայտարարությունը, վստահ եմ, որոշ ժամանակ հասարակության մի շերտի մոտ ստեղծեց ինքնավստահության և անվտանգության զգացում։
Նույնը հիմա փորձում է արվել այս զորահանդեսի պարագայում։ Սա նախընտրական, քարոզչական զորահանդես է, որը միտված է հասարակության մի հատվածի մոտ տպավորություն ստեղծել, թե մեր անվտանգությունը ապահովված է։
Բայց մենք չգիտենք՝ վաղը հրապարակ դուրս եկող զենքերից քանիսն են ամբողջական, քանիսը չեն կրկնելու ՍՈւ-երի ճակատագիրը, արդյոք դրանք համալրված են անհրաժեշտ բոլոր պարագաներով, մատակարարման հարցերը լուծվա՞ծ են, թե՞ ոչ։
Մենք տեսնելու ենք շոու։ Այս հարցերի պատասխանները մենք չենք ստանալու, բայց այս իշխանության դեպքում մենք կարող ենք նաև կանխատեսել այդ պատասխանները։
Իրականությունն այն է, որ Նիկոլ Փաշինյանի և նրա թիմի կառավարման պարագայում մենք ուղղակի հնարավորություն չունենք մեր անվտանգային խնդիրները լուծելու։ Մենք ունենալու ենք անվտանգային խնդիրներ, շարունակելու ենք լինել պարտված և անվտանգային ճգնաժամի մեջ՝ այս իշխանության պարագայում, նույնիսկ եթե նրանց հրամանատարության տակ լինի անգամ ՆԱՏՕ-ի բանակը։
Ուրեմն անվտանգային խնդիրները լուծելու ճանապարհը իշխանության փոփոխությունն է։
