Մեծ Բրիտանիան և Ֆրանսիան այսօր Լոնդոնում հավաքված ռազմական պլանավորողներին տեղեկացրել են, որ «գործնական ռազմական տարբերակներ» կպահանջվեն ռազմավարական նշանակություն ունեցող Հորմուզի նեղուցում նավագնացության ազատությունն ապահովելու համար։ Այս մասին հայտնում է CNN-ը։
«Ձեր խնդիրն է՝ մեր առաջնորդների ձեռք բերած դիվանագիտական համաձայնությունը վերածել գործնական ռազմական քայլերի։ Դա պետք է արվի համակարգված համատեղ պլանի միջոցով, որն ուղղված կլինի նեղուցում նավագնացության ազատության պաշտպանությանը»,— ասված է Մեծ Բրիտանիայի պաշտպանության նախարար Ջոն Հիլիի և նրա ֆրանսիացի գործընկեր Կատրին Վոտրենի համատեղ ուղերձում։
«Դիվանագիտական թափը գործողության վերածելը պահանջում է հստակ պլանավորում, անկեղծ քննարկում և դաշնակից ու գործընկեր երկրների հաստատակամ հանձնառությունը։ Մենք երախտապարտ ենք այն պետություններին, որոնք արդեն իսկ հայտնել են իրենց ներդրումն ունենալու պատրաստակամության մասին»,— նշվում է պաշտպանական գերատեսչությունների երկու ներկայացուցիչների հայտարարության մեջ, որը տարածել է Մեծ Բրիտանիայի պաշտպանության նախարարությունը։
«Մենք համոզված ենք, որ իրական առաջընթացը հնարավոր է։ Մենք կարող ենք օգնել վերաբացել նեղուցը, կայունացնել համաշխարհային տնտեսությունը և պաշտպանել մեր ժողովուրդներին»,— նշել են երկու երկրների պաշտպանական գերատեսչությունների ղեկավարները։
Տասնյակ երկրների ռազմական ստրատեգներ այսօր հավաքվել են Լոնդոնի հյուսիսում գտնվող Մեծ Բրիտանիայի մշտական միացյալ շտաբում։ Երկօրյա համաժողովի երկրորդ օրը նրանք կքննարկեն ջրային ուղու աշխատանքի վերականգնմանն ուղղված քայլերը։
