«Այս խորհրդարանի, ընդհանրապես մեր իրականության գլխավոր հարցը այն չէ, թե Հայաստանը որքանով կկարողանա Ռուսաստանից անկախ քաղաքականություն վարել, այդպես փորձում է ներկայացնել ՔՊ-ն։
Անկախության հռչակումից ի վեր, 90-ականներից սկսած, մեր քաղաքականությունը եղել է հնարավորինս ինքնուրույն, բալանսավորված, կոմպլեմենտար, Հայաստանի ազգային-պետական շահերից բխող։
2000-ականներին և՛ Ռուսաստանի, և՛ Միացյալ Նահանգների, և՛ Իրանի, և՛ Վրաստանի հետ մենք ունեցել ենք բնականոն հարաբերություններ։ Նույն տրամաբանությամբ՝ Եվրախորհրդի անդամություն, Հազարամյակի մարտահրավերների հիմնադրամի ծրագրեր, Իրանի հետ գազամուղ, էներգետիկ ենթակառուցվածքներ, Ռուսաստանի հետ ռազմավարական գործակցություն։ Ազգային շահի վճռական պաշտպանության բազմաթիվ օրինակներ կան աշխարհի հզոր պետությունների հետ հարաբերություններում։
Հիշողության թարմացում․ այդ շրջանում Հայաստանի ղեկավար 10 տարի Ռոբերտ Քոչարյանն էր։
Տարբեր է եղել Ադրբեջանի և Թուրքիայի պարագան․ նրանցը՝ թշնամական, մերը՝ անզիջում՝ Արցախի ինքնորոշման իրավունքի իրացման և ցեղասպանության միջազգային ճանաչման առումով։
Եվ Հայաստանի այդ ինքնուրույն քաղաքականությունը ընկալում ու ընդունում էին բոլոր ուժային կենտրոնները»,- այս մասին այսօր՝ օգոստոսի 7-ին, հայտարարեց ԱԺ «Հայաստան» խմբակցության պատգամավոր Աղվան Վարդանյանը։
Մանրամասն՝ տեսանյութում։
