Մադագասկարի նախագահ Անդրի Ռաձուելինան հոկտեմբերի 14-ին հայտարարել է, որ ցրել է խորհրդարանը։ Նախագահը, որը փախել է երկրից, ավելի վաղ հրաժարվել էր հեռանալ պաշտոնից։«Արմենպրես»-ի փոխանցմամբ՝ այս մասին հաղորդում է Reuters գործակալությունը։
Ռաձուելինան հրամանագիր է հրապարակել Facebook-ում՝ նշելով, որ խորհրդակցել է Ազգային ժողովի և Սենատի ղեկավարների հետ։ Reuters-ը նշում է, որ այս պահին պարզ չէ՝ արդյոք այս քայլն իրավական արժեք ունի թե ոչ։
Մի քանի շաբաթ շարունակվող բողոքի ակցիաների մասնակիցները, որոնք հիմնականում երիտասարդներ են՝ Z սերնդի ներկայացուցիչներ, պահանջում են նախագահի հրաժարականը։ Բազմաթիվ զինվորականներ ևս միացել են ցուցարարներին։
Ընդդիմությունը փորձում է բավարար չափով ստորագրություններ հավաքել, որպեսզի խորհրդարանում սկսի նախագահի իմփիչմենթի գործընթաց։
Մադագասկարի Ազգային ժողովի անդամները քվեարկեցին նախագահ Անդրի Ռաջոելինային պաշտոնանկ անելու օգտին 130 ձայնով, մեկ դատարկ քվեաթերթիկով։ BBC News-ը հաղորդում է, որ Գերագույն սահմանադրական դատարանը պետք է հաստատի արդյունքները։
Բանակը շրջափակել է մայրաքաղաք Անտանանարիվուի դատարանի շենքի շրջակայքը։
Նախագահ Ռաջոելինան դատապարտեց պաշտոնանկության քվեարկությունը։ Նա նշեց, որ նիստը տեղի է ունեցել Ազգային ժողովի իր կողմից լուծարման ֆոնին և քվեարկությունը որակեց հակասահմանադրական։
Ռոյթերսի հաղորդմամբ՝ Ռաջոելինային պաշտոնանկ անելու քվեարկությունից հետո CAPSAT էլիտար ռազմական ստորաբաժանումը հայտարարեց, որ ստանձնում է իշխանությունը։ AFP-ն հաղորդում է, որ «բանակի գնդապետը» հայտարարել է, որ զինվորականները ստանձնել են հրամանատարությունը։
Ավելի վաղ Ռաջոելինան, որի գտնվելու վայրը ներկայումս անհայտ է, հայտարարել էր խորհրդարանի լուծարման մասին։ Ազգային ժողովի փոխնախագահ և ընդդիմության առաջնորդ Սիտենի Ռանդրիանասուլոնիայկուն կասկածի տակ էր դրել նախագահական հրամանագրի վավերականությունը։ Նա պնդում էր, որ փաստաթուղթն անվավեր է, քանի որ այն հայտարարվել է սոցիալական ցանցերում և, հետևաբար, բացակայում է նախագահի ստորագրությունն ու կնիքը։ Ներկայացուցիչների պալատը չի ստացել բնօրինակը։
