Երևանի ընդհանուր իրավասության քաղաքացիական դատարանի՝ լիազորությունները դադարեցված դատավոր Արթուր Ստեփանյանի իրավունքներն այդպես էլ չվերականգնվեցին։
Փաստացի հաստատվել է, որ ԲԴԽ-ում ՍԴ որոշման հիման վրա վերաբացված գործի քննությունը բացառապես ձևական բնույթ է ունեցել։ «Փաստինֆո»-ի հաղորդմամբ՝ քիչ առաջ ԲԴԽ-ն հրապարակել է դատավորի վերաբերյալ որոշումը՝ վերացնելով իր կողմից նախկինում կայացված որոշումը և նոր որոշում կայացնելով՝ կրկին բավարարելով Արթուր Ստեփանյանին կարգապահական պատասխանատվության ենթարկելու մասին ՀՀ ԱՆ՝ 2024թ․ ներկայացված միջնորդությունը և դադարեցնելով դատավորի լիազորությունները։ Ասել է թե՝ խորհուրդը պարզապես փորձել է վերացնել ընթացակարգային խնդիրները՝ հետևանքը թողնելով անփոփոխ։ Ի դեպ, որոշումը հրապարակվել է նախատեսված ժամից մոտ 30 րոպե ուշ, թե ինչու էր Խորհուրդը ձգձգում որոշման հրապարակումը՝ պարզ չէ։
Հիշեցնենք, որ ԲԴԽ-ն 2024 թ․ հուլիսի 9-ին դադարեցրել էր Արթուր Ստեփանյանի դատավորի լիազորությունները, որի նկատմամբ կարգապահական վարույթը ՀՀ արդարադատության նախարարությունը հարուցել էր Դանիել Իոաննիսյանի հաղորդման հիման վրա։ Վերջինս, մատնանշելով «Փաստերի ստուգման հարթակի» 2023 թ․ հրապարակումը, պնդել էր, թե Արթուր Ստեփանյանն իբր 102 գործով խախտել է դատավարական ժամկետները։
ԱՆ-ի վարույթի ընթացքում պարզվել էր, որ, այսպես կոչված, ժամկետների խախտումներ արձանագրվել են 85 գործով, որոնց թվում հաշվարկվել են նաև կարճաժամկետ ուշացումները՝ օրինակ՝ 1 կամ 3 օր։ Մինչդեռ նման ուշացումների դեպքում նախարարությունը սովորաբար վարույթ չի հարուցում՝ հաշվի առնելով դատավորների գերծանրաբեռնվածությունը։
Բացի այդ, ԱՆ-ն վարույթը հարուցել էր ոչ պատշաճ սուբյեկտի հաղորդման հիման վրա, քանի որ Դանիել Իոաննիսյանը, ինչպես նշել էր դատավոր Արթուր Ստեփանյանը, գործով շահագրգիռ անձ չէ, մինչդեռ միայն կողմը կարող է գնահատել՝ իր իրավունքը խախտվել է, թե ոչ։ Այդուհանդերձ, գործը հասել էր ԲԴԽ, և վերջինս, փոխարենը կարճելու, ընդամենը 5 կողմ ձայնով որոշել էր դադարեցնել դատավորի լիազորությունները։
Արթուր Ստեփանյանը դիմել էր ՍԴ, որն իր որոշմամբ հակասահմանադրական էր ճանաչել «Դատական օրենսգիրք» սահմանադրական օրենքի այն դրույթը, ըստ որի՝ ԲԴԽ-ի հինգ անդամների ձայները բավարար էին դատավորի լիազորությունները դադարեցնելու համար։ Փաստացի, ՍԴ-ն արձանագրել էր այն, ինչը բազմիցս բարձրաձայնել էր մասնագիտական հանրությունը։ Հակասահմանադրական ճանաչված նորմի հեղինակը Կարեն Անդրեասյանն է. նրա պաշտոնավարման ընթացքում էլ իրականացվել էին օրենսդրական այն փոփոխությունները, որոնց արդյունքում դատավորի լիազորությունները դադարեցնելու համար անհրաժեշտ էր ոչ թե 7, այլ 5 կողմ ձայն։
Այդ փոփոխությունները դեռ այն ժամանակ քննադատվել էին մասնագիտական հանրության կողմից։ Նշենք, որ ՄԻԵԴ-ում առաջնահերթության կարգով քննվում էր դատավոր Արթուր Ստեփանյանի գանգատը, որով կոմունիկացիան արդեն ավարտական փուլում է։
ՍԴ որոշման հիման վրա Արթուր Ստեփանյանը ԲԴԽ դիմում է ներկայացրել՝ պահանջելով վերանայել գործը և վերականգնել Ստեփանյանին՝ պաշտոնում։ Արդյունքում՝ գործը վերաբացվել է, սակայն՝ առանց դատավորի կարգավիճակի հստակեցման։
Հեղափոխությունից հետո լիազորությունները դադարեցրած դատավորների ցանկը.
