Լեմկինի ցեղասպանության կանխարգելման ինստիտուտը խորը մտահոգություն է հայտնում Ադրբեջանի նախագահի վերջին արտահայտությունների վերաբերյալ, որոնցում նա հայ քաղաքական կալանավորներին և ռազմագերիներին համեմատել է Նյուրնբերգյան դատավարությունում դատապարտված նացիստ առաջնորդների հետ
Ալիևի համեմատությունը չի արտացոլում պատմական իրականությունը: Ադրբեջանի նախագահի մեկնաբանությունները ցույց են տալիս նրա շարունակական անհարգալից վերաբերմունքն ԱՄՆ ղեկավարության նկատմամբ, որի փոքր խնդրանքները հայերի անունից նա պարբերաբար մերժում է:
Չնայած ոչ մի հավաստի ապացույց չկա, որ Բաքվում ներկայումս պահվող հայերից որևէ մեկը կատարել է որևէ հանցագործություն, առավել ևս՝ մարդկության դեմ հանցագործություններ և ցեղասպանություն, Ալիևը և նրա կառավարությունը հավաստի դիտորդների և միջազգային իրավական փորձագետների, այդ թվում՝ Լեմկինի ինստիտուտի կողմից, մեղադրվում են ԼՂ–ում կատարված ցեղասպանության և մարդկության դեմ հանցագործությունների համար:
Լեմկինի ինստիտուտը կոչ է անում Ադրբեջանի կառավարությանը դադարեցնել հայերի դեմ իր անմարդկային, ցեղասպանական հռետորաբանությունը և անհապաղ ազատ արձակել բոլոր հայ բանտարկյալներին: Քանի որ նախագահ Ալիևն ինքն է հայտարարել, որ դա չի անի, միջազգային հանրությունը պետք է ճնշում գործադրի նրա վրա դա անելու համար:
