ՔՊ-ական կառավարությունը նախատեսում է փոխել այն բոլոր դպրոցների անունները, որոնք անվանակոչված են Արցախյան պատերազմների հերոսների հիշատակին։ Նախագիծը բխում է այսպես կոչված «խաղաղության պայմանագրից», պատվերը, ըստ երևույթին, եկել է Ադրբեջանից, կամ էլ, գուցե, իշխանությունն անում է սեփական նախաձեռնությամբ՝ Ալիևին դուր գալու համար։ Գրում է «Արմլուր»-ը:
Այսպես, մեր տեղեկություններով, նախատեսում են փոխել Ազգային հերոսներ Մոնթե Մելքոնյանի, Թաթուլ Կրպեյանի, Մովսես Գորգիսյանի, Վազգեն Սարգսյանի անվան դպրոցների անունները, Երևանի հ. 147 հիմնական դպրոցը, որը կրում է 2016 թ. Ապրիլյան քառօրյա պատերազմի հերոս, Արցախի հերոս Ռոբերտ Աբաջյանի անունը, Երևանի թիվ 22 հիմնական դպրոցը, որն անվանակոչվել է 44-օրյա պատերազմի մասնակից Գևորգ Արշակյանի անունով, Արցախյան ազատամարտի բժիշկ-ազատամարտիկ Արտակ Խաչատրյանի անունը կրող դպրոցը՝ Տաշիրում և այլն։
Բազմաթիվ են դպրոցները, որոնք կրում են հերոսների անունները։ Ինչպես նաև տարբեր տարիներին բազմաթիվ դասարաններ, ռազմագիտության կաբինետներ և լսարաններ են անվանակոչվել զոհված հերոսների անուններով (Ձորագյուղի հիմնական դպրոցի ռազմագիտության կաբինետը կրում է հերոս Հակոբ Սողոյանի անունը, Բերքառատի միջնակարգ դպրոցում ստեղծվել է Գևորգ Ասատրյանի անվան դասարան, Թորոսգյուղի միջնակարգ դպրոցում բացվել են Վաչագան Սարգսյանի, Արման Գրիգորյանի և Ալեք Ղուկասյանի անվան դասասենյակներ, Դրախտիկի միջնակարգ դպրոցում դասասենյակներ են անվանակոչվել Ալեքսանդր Օսիպյանի, Իվան Կիրակոսյանի, Սերգեյ Երիցյանի և Գնել Աղաջանյանի անուններով և այլն)։
Մենք տեղեկությունը ճշտելու համար կապ հաստատեցինք նաև ԿԳՄՍ նախարարության մամուլի խոսնակի հետ, ով նշեց․ «Իհարկե ոչ, ձեր կողմից նշված տեղեկությունը չի համապատասխանում իրականությանը։ ԿԳՄՍ նախարարությունում նման նախաձեռնություն կամ քննարկում չկա»։
Տեղեկությունը ճշտելու նպատակով զրուցեցինք նաև ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի անդամ, ՔՊ խմբակցության պատգամավոր Թագուհի Ղազարյանի հետ, ով պատասխանեց․ «Նման նախաձեռնություն կամ քննարկում չկա»։
Սակայն, ըստ մեր աղբյուրների, նախագիծը շրջանառության մեջ կդրվի ընտրություններից հետո, եթե ՔՊ-ն ընտրվի։ Ըստ մեր տեղեկությունների՝ նախատեսում են, որ սեպտեմբերից՝ նոր ուսումնական տարվանից, որևէ դպրոց չկրի արցախյան պատերազմներին առնչվող անուններ։
