Այսօր առավոտյան քննչական մարմինը բնականաբար իրավապահ մարմնի ներկայացուցիչների ուղեկցությամբ խուզարկություններ է կատարել Արագածոտնի թեմի հոգևորականների անձնական տներում, Արագածոտնի թեմի առաջնորդարանում ու աշխարհիկ մի քանի աշխատակիցների բնակարաններում։ Այս մասին Քննչական կոմիտեի մոտ լրագրողների հետ զրույցում նշեց փաստաբան Արա Զոհրաբյանը։
«Առգրավել են տարբեր տեսակի փաստաթղթեր, համակարգիչներ, այդ թվում աշխարհիկ մի աշխատակցուհու ընտանիքի անդամների համակարգիչները, բոլորի հեռախոսները, և իրենց էլ փաստացի բերման են ենթարկել, բերել են այստեղ։ Բացի Մկրտիչ սրբազանից, մնացածը այստեղ են։ 6 հոգևորականներ և մի քանի աշխարհիկ աշխատակիցներ՝ գանձապահ, գործավար, հաշվապահ», — նշեց նա։
Փաստաբանը նաև հայտնեց, որ նրանց չեն հայտնում Արագածոտնի թեմի առաջնորդ Մկրտիչ եպիսկոպոս Պռոշյանի գտնվելու վայրը․ «Ընդ որում՝ մենք պաշտոնապես դիմել ենք Քննչական կոմիտեին և Երևանի քննչական վարչությանը, ներկայացրել ենք նաև մեր լիազորությունները հավաստող փաստաթղթերը և խնդրել ենք, որպեսզի իրենք ապահովեն մեր հանդիպումը Մկրտիչ սրբազանի հետ՝ նրա իրավունքները պաշտպանելու նկատառումներից ելնելով»։
«Այստեղ նաև բերման ենթարկվածներին են հանդիպել։ Քննիչները նրանց ասել են, որ մենք ձեզ բերման չենք ենթարկել, մենք ձեզ հրավիրել ենք, բայց բերել են իրենց մեքենաներով և իրենք այլ որոշում, այլ ընտրություն կատարելու հնարավորություն չեն ունեցել, փաստացի բերման ենթարկված են եղել։ Միաբերան բոլորը պնդեցին՝ եթե այդպես է, մենք գնալու ենք, մեզ ծանուցագիր տվեք, մենք կգանք մեր փաստաբանների ուղեկցությամբ և ձեր հարցերին կպատասխանենք։ Եթե իրենց հարկադիր բերման են ենթարկել, բայց որպես վկա են հարցաքննում, նա արդեն ունի վկա-կասկածյալի կարգավիճակ և քննչական մարմինը պարտավոր է նրանց պաշտպանության իրավունքը ապահովել։Այստեղ արդեն ուրիշ ռեժիմով է հարցաքննությունը գնում, իրենք ունեն նաև դատավորական այլ երաշխիքներ։
Բնականաբար, քննչական մարմինը այլ բան չի կարողացել այդ փաստարկի դեմ ներկայացնել և համաձայնվել են, որ այդպես էլ անեն։ Մեկ քահանայի տվել են ծանուցագիր՝ դուրս է եկել, հետո ներս կանչեցին ու մինչև հիմա դուրս չի եկել։ Հիմա բոլորը ներսում են վկայի կարգավիճակով»,- ասաց նա։
