Իսրայելը կարձագանքի շիական «Հեզբոլլահ» շարժման կողմից Լիբանանում իր ուժերի դեմ ուղղված ցանկացած հարձակմանը։ Այս մասին հայտարարել է Իսրայելի վարչապետ Բենիամին Նեթանյահուն՝ ընդգծելով, որ իսրայելական զորքերը մտադիր չեն դուրս գալ հարավային Լիբանանից։
Նա ասել է, որ այսօր առավոտյան հանդիպում է ունեցել Իսրայելի պաշտպանության նախարար Իսրայել Կացի և շտաբի պետ Էյալ Զամիրի հետ՝ Լիբանանի վրա գիշերը տեղի ունեցած հարվածներից հետո ստեղծված իրավիճակը գնահատելու համար։
«Իմ հրամանը շատ հստակ է. Իսրայելը չի հանդուրժի մեր զինվորների կամ մեր տարածքի վրա հարձակումները, և մենք կստիպենք «Հեզբոլլահին» շատ բարձր գին վճարել այդ հարձակումների համար։ Իսրայելը կմնա հարավային Լիբանանի անվտանգության գոտում այնքան ժամանակ, որքան անհրաժեշտ կլինի Իսրայելի հյուսիսային բնակավայրերը պաշտպանելու համար», — հավելել է վարչապետը։
