Վիտալի Մանգասարյանը ֆեյսբուքյան իր էջում գրում է․
ՀՀ Կառավարությունը շրջանառության մեջ է դրել մի օրինագիծ, որը նախատեսում է պարտադիր ժամկետային զինծառայության տևողության կրճատումը 24 ամսից դարձնել 18 ամիս՝ սկսած 2026 թվականի ամառային զորակոչից։ Թեև նախագիծը ներկայացվում է որպես ԶՈւ-ում նախատեսված բարեփոխում, այն իրականում լուրջ մտահոգությունների և ռիսկերի տեղիք է տալիս, հատկապես մեր տարածաշրջանում և աշխարհում տիրող ներկայիս ռազմաքաղաքական բարդ իրավիճակում։
Այս համատեքստում իշխանությունները խոսում են «խաղաղության դարաշրջանի» մասին՝ այն համեմատելով ծաղկի հետ, որը պետք է ջրել, պարարտացնել և «քախան անել»։ Սակայն, այս տրամաբանության մեջ, զինվորական ծառայության կրճատման մասին նախագիծը ավելի շատ նման է ծաղկի բողբոջը հենց արմատից կտրելու գործընթացի։ Հատկապես, եթե «խաղաղության ծաղիկը» դեռևս չի բացվել, ապա նմանօրինակ քայլերը թուլացնում են այն միջոցները, որոնք կարող են պաշտպանել այդ ծաղիկը:
Աշխարհում տեղի ունեցող անկանխատեսելի գործընթացների ֆոնին, շատ երկրներ, որոնք նախկինում հրաժարվել էին պարտադիր զինվորական ծառայությունից, այժմ վերանայում են իրենց դիրքորոշումը և մտածում են այն վերականգնելու մասին։ Նրանք զգալիորեն մեծացնում են իրենց ռազմական բյուջեները, ակտիվացնում են բանակի մարտունակությունը բարձրացնելու ծրագրերը՝ հասկանալով, որ անվտանգությունն այլևս տրված չէ։ Միևնույն ժամանակ, Հայաստանի կառավարությունը, որը իրենց իսկ նկարագրությամբ, յոթ տարի մնացել է նույն դասարանում, անտեսելով տարածաշրջանային ու համաշխարհային մարտահրավերները, գնում է բանակը կրճատելու և թուլացնելու ճանապարհով։
Հ.Գ
Ցավոք սրտի սա դեռ սկիզբն է…
