Yerkir.am-ը հարցում էր ուղարկել վարչապետի աշխատակազմի ղեկավարի տեղակալ, Հայաստանի ազգային ագրարային համալսարանի հոգաբարձուների խորհրդի անդամ Զարուհի Մաթևոսյանին համալսարանում առկա խնդիրների վերաբերյալ պարզաբանում ստանալու նպատակով: Մասնավորապես անդրադարձել էինք շուրջ երկու տարի համալսարանի ռազմավարական ծրագրին չունենալուն:
Վարչապետի աշխատակազմի ղեկավար Արայիկ Հարությունյանը հանձնարարական էր ուղարկել ԿԳՄՍ և էկոնոմիկայի նախարարներ Ժաննա Անդրեասյանին և Գևորգ Պապոյանին հարցմանը պատասխանելու նպատակով:
Երկու գերատեսչություններն էլ պատասխանել էին նույն բովանդակությամբ՝
«ՀԱԱՀ ռեկտոր ընտրվել է 2025 թվականի մարտի 19-ին։ Հենց այդ նույն օրը՝ 2025 թվականի մարտի 19-ին, ՀԱԱՀ ՀԽ-ը հաստատել է ՀԱԱՀ ընտրված ռեկտորի կողմից ներկայացված ՀԱԱՀ զարգացման և բարեփոխման հայեցակարգը (ՀԱԱՀ կանոնադրության 29-րդ կետի 1-ին ենթակետով սահմանված է, որ ՀԱԱՀ ՀԽ հաստատում է ՀԱԱՀ գործունեության տարեկան և երկարաժամկետ ռազմավարական ծրագրերը)։
2025 թվականի մարտին ՀԱԱՀ ներկայիս ռեկտորի ներկայացրած և ՀԱԱՀ ՀԽ հաստատված ՀԱԱՀ զարգացման և բարեփոխումների հայեցակարգի հիման վրա, մշակվել է ՀԱԱՀ 2026-2030 թվականների ռազմավարական ծրագրի նախագիծ և այն ներկայացվել է ՀԱԱՀ ՀԽ-ի քննարկմանը՝ 2025 թվականի նոյեմբերի 25-ին կայացած նիստում։ Նույն նիստի ընթացքում ՀԱԱՀ ՀԽ-ը որոշել է ծրագրի նախագծում կատարել լրացումներ և այն քննարկել առանձին նիստում։
Մինչ այդ ՀԱԱՀ-ն առաջնորդվում է 2025 թվականի մարտի 19-ին ՀԱԱՀ ՀԽ-ի հաստատած ՀԱԱՀ զարգացման և բարեփոխումների հայեցակարգով»։
Yerkir.am-ը Արայիկ Հարությունյանին է ուղարկել հոգաբարձուների խորհրդի 2025թ. մարտի 19-ի արձանագրությունը, որտեղ սևով սպիտակի վրա գրված է, որ այդ նիստում նման հարց չի քննարկվել ու չի հաստատվել: Ավելին, նման հարց չէր էլ կարող քննարկվել, որովհետև ռեկտորի ընտրության կանոնակարգով հստակ սահմանվում է ռեկտորի ընտրության նիստի օրակարգը, և այլ հարց չէր կարող ներառվել այդ օրակարգում:
Ստացվում է, որ վարչապետի աշխատակազմ, ապա զանգվածային լրատվության միջոցին ԿԳՄՍ և էկոնոմիկայի նախարարությունների կողմից ներկայացվել է իրականությանը չհամապատսխանող տեղեկատվություն:
Yerkir.am-ը դիմել է Արայիկ Հարությունյանին, պարզելու համար, թե որ կառույցը կամ անձն է տրամադրել ապատեղեկատվությունը և արդյոք որևէ մեկը պատասխանատվության ենթարկվել է ապատեղեկատվություն տալու համար:
