Նիկոլ Փաշինյանը ստացել է ԱՄՆ նախագահ Դոնալդ Թրամփի պաշտոնական հրավերը՝ «Խաղաղության խորհրդին» որպես հիմնադիր անդամ միանալու վերաբերյալ։
Փաշինյանի խոսնակ Նազելի Բաղդասարյանի փոխանցմամբ՝ Փաշինյանն ընդունել է առաջարկը՝ վերահաստատելով Հայաստանի հանձնառությունը խաղաղության առաջմղմանը:
Իսկ ի՞նչ է մեզ հայտնի «Խաղաղության խորհրդի» մասին։
Խաղաղության խորհուրդը (Board of Peace) միջազգային նոր կառույց է, որը նախաձեռնվել է ԱՄՆ-ի կողմից Դոնալդ Թրամփի ղեկավարությամբ, որն ուղղված է հակամարտությունների միջազգային կարգավորմանը և խաղաղության վերականգնմանը: Հիմքում միջազգային մասնակցության և խաղաղաշինության գաղափարն է, սակայն կառուցվածքը, լիազորություններն ու մեխանիզմները դեռևս ձևավորման փուլում են: Շատ պետություններ Այս նախաձեռնությունը դիտարկում են զգուշությամբ և քննադատությամբ, հատկապես ՄԱԿ-ի հետ դրա հնարավոր մրցակցության և մասնակցության պայմանների պատճառով:
Մասնակցության պայմանները
Կանոնադրության նախագծի համաձայն ՝ մասնակիցները կարող են ՝
• կառույցի անդամ լինել երեք տարի ժամկետով (նախագահի հայեցողությամբ երկարաձգելու հնարավորությամբ), կամ
• վճարել առնվազն 1 մլրդ դոլար՝ այդ կառույցում մշտական տեղ ստանալու համար։
Մի շարք պետություններ ժամանակավորապես կամ ամբողջությամբ հրաժարվել են մասնակցությունիցկամ հարցականի տակ են դնում իրենց անդամակցությունը։ Օրինակ՝
1. Ֆրանսիա – պաշտոնապես հրաժարվում է մասնակցել ծրագիրին:
• Ֆրանսիայի արտաքին գործերի նախարար Ժան-Նոել Բարրոն հայտարարել է, որ Ֆրանսիան այս փուլում չի կարող ընդունել նախաձեռնությունը, քանի որ խորհրդի կանոնադրությունը դուրս է գալիս ՄԱԿ-ի կողմից հաստատված Գազայի հետպատերազմյան վերականգնման և կառավարման շրջանակներից։ Նրա խոսքով՝ դա անհամատեղելի է Ֆրանսիայի միջազգային պարտավորությունների հետ, հատկապես ՄԱԿ-ին անդամակցության, որը չի կարող կասկածի տակ դրվել։
• Թրամփը քննադատել է այս որոշումը՝ սպառնալով, որ ֆրանսիական գինիների և շամպայնների համար 200 տոկոս բարձր մաքսատուրք կսահմանի և այդ քայլը ճնշում կգործադրի Ֆրանսիայի նախագահ Էմանուել Մակրոնի վրա, որպեսզի նա միանա իր առաջարկած նախաձեռնության:
2. Կանադա – չի հրաժարվել անդամակցությունից ամբողջությամբ, սակայն ընդգծել է, որ չի պատրաստվում վճարել հարկադրված $1 միլիարդ այնպիսի մշտական անդամակցության համար։
3. ԵՄ – մի շարք այլ երկրներ (օրինակ՝ Գերմանիա) նույնպես նշում են, որ ուսումնասիրում են առաջարկը, բայց ցույց են տալիս զգուշավորություն կամ հավանաբար չեն միանալու և այլն։
Փաստացի՝ «Խաղաղության խորհրդի» շուրջ ձևավորվող գործընթացը դեռևս չունի միջազգային կոնսենսուս, հստակ իրավական հիմք և ընդունելի մանդատ նունիսկ նրա նախաձեռնող դաշնակիցների համար։ Այդ պայմաններում Հայաստանի մասնակցությունը, որի մասին համաձայնություն է հայտնել Նիկոլ Փաշինյանը, առաջացնում է ավելի շատ հարցեր, քան պատասխաններ․ Հայաստանը ի՞նչ է շահելու այդ նախաձեռնությունից, ի՞նչ երաշխիքներ ունի և ի՞նչ գին կարող է վճարել Հայաստանը այս նախաձեռնության մեջ ներգրավվելու համար։
