2025 թվականի հունվարի 1-ին Սևանա լճի մակարդակը կազմել է 1900,39 մետր: Այն մինչև հունիսի 8-ը բարձրացել է 38 սմ-ով՝ կազմելով 1977 մետր: Հունիսի 9-ից սկսած՝ լճի մակարդակը մինչև այսօր իջել է 55 սմ-ով: Այսօրվա դրությամբ լճի մակարդակը կազմում է 1900,22 մետր, ինչը նախորդ տարվա նույն օրվա մակարդակից ցածր է 17 սմ-ով: Լճի ծավալը կազմում է 37,8 կմ խորանարդ, իսկ մակերեսը՝ 1275 կմ քառակուսի: Այդ մասին, այսօր՝ դեկտեմբերի 29–ին, մամուլի ասուլիսի ժամանակ ասաց ՀՀ շրջակա միջավայրի նախարարության «Հիդրոօդերևութաբանության և մոնիթորինգի կենտրոնի» տնօրեն Լևոն Ազիզյանը:
Ըստ նրա՝ Արփա-Սևան ջրատարով Սևանա լիճ տեղափոխված ջրի քանակը մինչև դեկտեմբերի 28-ը կազմել է 119,6 մլն, որը 65,4 մլն-ով պակաս է նախորդ տարվա նույն ժամանակահատվածում տեղափոխված ջրի քանակից:
Ոռոգման նպատակով ջրի բացթողումը սկսվել է հունիսի 6-ին և շարունակվել մինչև սեպտեմբերի 27-ը: Այդ ժամանակահատվածում լճից բացթողնված ջրի ծավալը կազմում է 180 մլն 965 հազար, ինչը 49,9 մլն-ով ավելի է 2024 թվականի ցուցանիշից:
«2025 թվականին ՊՈԱԿ-ի կողմից դիտարկվող 5 խոշոր ջրամբարներից 3-ում՝ Ախուրյանում, Ազատում և Մարմարիկում, ունեցանք 100 տոկոս լցվածություն, իսկ Արփի լճում և Ապարանի ջրամբարում՝ 51 տոկոս լցվածություն:
Այսօրվա դրությամբ՝ ՊՈԱԿ-ի կողմից դիտարկվող 5 խոշոր ջրամբարներում ջրի ծավալի գումարային մեծությունը կազմում է 252 մլն խորանարդ մետր, որը 2024 թվականի նույն օրվա մեծության համեմատ 137 մլն խորանարդ մետրով պակաս է»,- ասաց նա:
