Հռոմի պապ Լևոն XIV-ի հրահանգով Ուկրաինա է ուղարկվել երեք բեռնատար, որոնք տարել են 80 էլեկտրագեներատոր, ինչպես նաև դեղորայք և սնունդ։ Մարդասիրական օգնությունն արդեն ժամանել է երկիր։
«Արմենպրես»-ի փոխանցմամբ՝ այս մասին հաղորդում է Vatican News-ը։Փետրվարի 4-ին տեղի ունեցած ունկնդրության ժամանակ Հռոմի պապը կոչ էր արել աջակցել Ուկրաինային՝ հաղթահարելու էներգետիկ ենթակառուցվածքին հասցվող հարվածների հետևանքները։
Նա նաև երախտագիտություն էր հայտնել բազմաթիվ թեմերում, մասնավորապես՝ Լեհաստանում իրականացված համերաշխության նախաձեռնությունների համար։«Պապն արձագանքել է բազմաթիվ եպիսկոպոսների կոչերին, որոնք, գիտակցելով պատերազմի պատճառած տառապանքները, աջակցություն են խնդրել՝ օգնելու Ուկրաինային հաղթահարել ուժեղ ցրտերի առաջացրած դժվարությունները։ Գիշերը ջերմաստիճանն իջնում է մինչև -15 աստիճան Ցելսիուս, մինչդեռ ցերեկը ջերմաստիճանը տատանվում է -10-ից մինչև -12 աստիճան Ցելսիուսի սահմաններում։ Շատ մարդիկ ստիպված են եղել լքել իրենց տները՝ տաքացվող ապաստարաններում ջերմություն փնտրելու համար, որտեղ գեներատորների շնորհիվ նրանք կարող են նաև տաք սնունդ ստանալ», – ասվում է հրապարակման մեջ։
Վատիկանից նաև հայտնել են, որ գեներատորների հետ մեկտեղ Ուկրաինա են ուղարկվել հազարավոր դեղամիջոցներ, այդ թվում՝ հակաբիոտիկներ, հակաբորբոքային դեղամիջոցներ, սննդային հավելումներ և մելատոնին, որը «հատկապես անհրաժեշտ է, քանի որ օգնում է մարդկանց քնել մշտական վախի և սթրեսի պայմաններում»:
Ուկրաինայի էներգետիկ ենթակառուցվածքին ռուսական հարվածների պատճառով հազարավոր մարդիկ զրկվել են էլեկտրամատակարարումից և ջեռուցումից։ Կիևի քաղաքապետը մայրաքաղաքի բնակիչներին կոչ է արել հնարավորության դեպքում հեռանալ։
