Հորմուզի նեղուցում նավագնացությունը վերականգնելու նպատակով կոալիցիա ստեղծելու ԱՄՆ փորձերը դեռևս որևէ արդյունք չեն տվել։ Այս մասին հայտնում է Axios պորտալը՝ հղում անելով իր աղբյուրներին։
Ըստ հրապարակման՝ Ամերիկայի տարբեր գործընկերների արձագանքը տատանվում է «թերահավատությունից մինչև կտրուկ «ոչ»»։ Աղբյուրների փոխանցմամբ՝ ամերիկյան վարչակազմը ձգտում է այդ դաշինքում ներգրավել Մեծ Բրիտանիային, Ֆրանսիային, Գերմանիային, Իտալիային, Ավստրալիային, Կանադային, Պարսից ծոցի երկրներին և Հորդանանին։ ԱՄՆ-ը նմանատիպ առաջարկով դիմել է նաև Ճապոնիային և Հարավային Կորեային։
Այդուհանդերձ, Գերմանիայի, Իտալիայի և Ճապոնիայի առաջնորդներն արդեն իսկ բացառել են տարածաշրջան ռազմածովային ուժերի նավեր ուղարկելու հնարավորությունը։ Ֆրանսիայի նախագահ Էմանուել Մակրոնը, ըստ աղբյուրներից մեկի, «միանշանակ պատասխան չի տվել, սակայն այս պահի դրությամբ դա մերժում է»։
Ավելի վաղ ԵՄ դիվանագիտության ղեկավար Կայա Կալասը հայտարարել էր, որ ԵՄ արտգործնախարարները հրաժարվել են Հորմուզի նեղուց ռազմական նավեր ուղարկել, այդ թվում նաև նրանք, որոնք արդեն իսկ գտնվում են Կարմիր ծովում՝ եվրոպական «Aspides» ռազմածովային առաքելության շրջանակներում։
