«Հենակետ» վերլուծական կենտրոնի ղեկավար Վիտալի Մանգասարյանի ֆեյսբուքյան գրառումը. «Hellobit և նմանօրինակ այլ անունով ներկայացվող «խաղը» կամ «վերլուծական հարթակը» վերջին ամիսներին մեծ տարածում է գտել հատկապես երիտասարդների շրջանում՝ խոստանալով արագ և հեշտ եկամուտներ։ Իրականում այն դասական ֆինանսական բուրգ է, որը գործում է պարզ տրամաբանությամբ: Համակարգը չունի իրական եկամտի աղբյուր, և ֆինանսական շահույթ կարող են ստանալ միայն նրանք, ովքեր ներգրավման շղթան ընդլայնելով նոր մարդկանց են բերում համակարգ։ Այս երևույթը, որը առաջին հայացքից թվում է սովորական խաբեբայություն, իրականում ավելի խորքային հետևանքներ ունի և կարուծում եմ, որ նաև ազգային անվտանգության լուրջ խնդրի է:
Մոտ մեկ ամիս առաջ իմ ուսանողներից մի քանիսը մոտեցան ինձ ու հետաքրքվեցին, թե արդյոք հնարավոր է Hellobit-ի կանոնների շրջանակում մշակել այնպիսի ալգորիթմ, որը թույլ կտար կայուն եկամուտ ստանալ։ Քանի որ նույնիսկ տեղյակ չէի նման հարթակի մասին, նախ ուսումնասիրեցի տրամաբանությունը և արդեն կարճ ժամանակ անց պարզ դարձավ, որ այս ամենը ոչ թե խաղ է, այլ դասական «լոխատրոն»:
Այդ օրվանից սկսած դասաժամերից մի քանիսը հատկացրի այս երևույթը մոդելավորելու և բացատրելու համար, թե ինչու նման սխեմաները չեն կարող աշխատել երկարաժամկետ։ Ցույց տվեցի, որ համակարգի գործող մեխանիզմը կախված է նոր ներգրավվածների թվից, ոչ թե իրական տնտեսական գործընթացներից, և որ ցանկացած պայմանների դեպքում ելքային արդյունքը նախապես որոշված է՝ կարող են շահել միայն կազմակերպիչները կամ նրանց կողմից վարձատրվող մարքեթինգային դերակատարները։ Իսկ «հաջողության պատմությունները», որոնք շրջանառում են, ուղղակի գործիք են՝ սխեման հանրության մեջ գրավիչ դարձնելու համար։
Չեմ կարող հստակ ասել՝ որքան արդյունավետ էր իմ փոքր պայքարը այս սխեմայի դեմ, սակայն համոզված եմ, որ ուսանողների շրջանում որոշակի իմունիտետ ձևավորվեց։ Սակայն սա բավարար չէ, քանի որ խնդիրը, կարծում եմ, համակարգային է։ Hellobit-ի նման երևույթները պետք է դիտվեն պետական մակարդակի խնդիր, և դրանց դեմ պայքարը պետք է լինի համակարգային, ոչ թե անձնական նախաձեռնությունների մակարդակում»։
