Նոյեմբերի 22-ին Փաշինյանի հետ ավտոբուսներով «Պետական մարմինների ներկայացուցիչների համաժողով» անունով միջոցառմանը շտապողներին՝ տարբեր գերատեսչությունների աշխատակիցներին Կարեն Դեմիրճյանի անվան մարզահամերգային համալիր են տեղափոխել ՀՀ պետական բյուջեի հաշվին։ Այս մասին «Փաստինֆո»-ն տեղեկացնում է բաց աղբյուրներում հրապարակված փաստաթղթերից։
ՀՀ արտաքին գործերի նախարարությունը 195.000 դրամ է տրամադրել «Էլիտբաս» ՍՊԸ-ին, որպեսզի ԱԳ աշխատակիցները տեղափոխվեն Համալիր։ Ավտոբուսային ծառայությունից օգտվելը ներկայացված է որպես ներկայացուցչական ծախս։
115.000 դրամ էլ նույն ՍՊԸ-ին տրամադրել է ՀՀ արդարադատության նախարարության ՔԾ-ն։ Նշենք, որ այս պարագայում էլ ավտոբուսի ծառայությունից օգտվելը ներկայացված է որպես Մարզահամերգային համալիր տեղախոխման համար ավտոբուսների վարձակալման ծառայություն։
Նշենք, որ ՍՊԸ-ի 50% բաժնեմասղը պատկանում է Գուրգեն Նիկողոսյանին, իսկ մյուս 50%-ը՝ Նարեկ Սարգսյանին 2011 թվականի մարտի 21-ից։
ՀՀ արտաքին գործերի նախարարության պետական արարողակարգի ծառայությունը պետբյուջեից 48.000 դրամ է հատկացրել «Այբ-Տուր» ՍՊԸ-ին Համալիր տեղափոխման համար։
Հիշեցնենք՝ ավելի վաղ «Փաստինֆո»-ն հայտնել էր, որ Կոմկուսը հիշեցնող միջոցառման համար պետբյուջեից վճարվել է 42 միլիոն 90 հազար դրամ, որից գումար է տրամադրվել նաև երգչուհի Իվետա Մուկուչյանին ելույթ ունենալու համար։
Հավելենք, որ միջոցառմանը չեն մասնակցել կողմնակի անձինք, մուտքը թույլատրելի է եղել բացառապես հրավիրատոմսի առկայության դեպքում, իսկ միջոցառմանը շտապող պաշտոնյաները փախչում էին լրագրողներից։
