Հայաստանն ու Իրանը կստեղծեն «Պարզեցված մաքսային միջանցքի» ռեժիմ։ Երկու երկրների միջև համապատասխան արձանագրության նախագիծը հավանության է արժանացել Հայաստանի կառավարության սեպտեմբերի 3-ի նիստում։
Պետական եկամուտների կոմիտեի պարզաբանական փաստաթղթում, մասնավորապես, նշվում է, որ համաձայնագրի ստորագրման նախաձեռնությունը ներկայացվել է իրանական կողմից։
Համատեղ մշակված նախագծի համաձայն՝ մի երկրի մաքսային մարմինները, հարևան երկիր ուղևորվող բեռները բաց թողնելիս, գործընկերներին էլեկտրոնային տվյալներ կփոխանցեն ապրանքների և դրանց ուղարկողների մասին։ Դրանից հետո ընդունող երկիրը պետք է այդ բեռները զննի պարզեցված կարգով։ Նման ռեժիմ նախատեսվում է կիրառել այն ձեռնարկությունների նկատմամբ, որոնց մասով երկու երկրների մաքսային մարմինները մաքսային օրենսդրության խախտման ռիսկեր չեն տեսնում։
Պարզեցված զննման հնարավորությունը հասանելի կլինի բոլոր տրանսպորտային միջոցների համար՝ բացառությամբ անձնական ավտոտրանսպորտի։
«Պարզեցված մաքսային միջանցքի կիրառումը կնվազեցնի բեռների ձևակերպման ժամանակային ծախսերը և էապես կարագացնի մեքենաների անցումը», — նշվում է հիմնավորման մեջ։
Հաշվի առնելով Հայաստանի և Իրանի սահմանին գտնվող «Մեղրի» հայկական անցակետի շենքի հիմնովին վերակառուցումը՝ նոր ռեժիմը հնարավոր կլինի կիրառել միայն այդ աշխատանքների ավարտից հետո։ Բանն այն է, որ անցակետը նոր ծառայողական տեխնիկայով կահավորվելու է միայն շինարարական աշխատանքների ավարտից հետո։
