Հայաստանը մեզ տեղեկացրել է, որ սահմանին այլ երկրներից ոչ մի զինվորական չի լինի, դա մեզ համար կարևոր է։ Դրա մասին լրագրողների հետ զրույցում հայտարարել է Կապանում Իրանի գլխավոր հյուպատոս Մորտեզա Աբեդին Վարամինը։
«Կարևոր չէ, թե ով ինչ է ասում, մեզ համար կարևորը Հայաստանի հայտարարություններն են։ Հայաստանի իշխանությունները մեզ հայտարարել են, որ սահմանները կմնան անձեռնմխելի, և Իրանի այս կարմիր գիծը կհարգվի։ Իրան-Հայաստան սահմանն ունի հազարամյակների պատմություն, և մենք այն համարում ենք բարեկամության և հանդուրժողականության սահման։ Այդ սահմանին մենք երբեք խնդիրների չենք հանդիպել։
Երկու երկրների միջև միշտ էլ ջերմ հարաբերություններ են եղել։ Արտաքին ուժերի միջամտությունն օգուտ չի բերի տարածաշրջանի երկրներին։ Հայաստանի դիրքորոշումը մեզ համար կարևոր է։ Իրանի բարձրաստիճան պաշտոնյաներն ամեն ինչ մանրամասն կուսումնասիրեն»,- նշել է նա՝ պարզաբանելով.
«Ես կասեի, որ Հայաստանի սահմանը Հայաստանի տրամադրության տակ է, իրանական կողմն էլ, բնականաբար, Իրանի հսկողության տակ է: ՀՀ-ի կողմից մեզ փոխանցվել է, որ ոչ մի ռազմական կցորդներ կամ այլազգի ներկայացուցիչներ սահմանին չեն լինելու»:
