Պաղեստինյան ՀԱՄԱՍ շարժումը հայտարարել է իր զինված ուժերը Գազայի հատվածից դուրս բերելու պատրաստակամության մասին՝ իսրայելական զորքերի դուրսբերման դիմաց։ Այս մասին հայտնել է համաարաբական «Ալ Արաբիա» հեռուստաալիքը՝ հղում անելով աղբյուրներին։
Կահիրեում գտնվող ՀԱՄԱՍ-ի պատվիրակությունը եգիպտացի միջնորդներին է փոխանցել Գազայում հնարավոր հրադադարի համաձայնագրի իր պահանջները։ Հեռուստաալիքի աղբյուրների համաձայն՝ պաղեստինյան շարժումը պատրաստ է դուրս բերել իր մարտիկներին՝ դեպի համաձայնեցված կետեր իսրայելական բանակի դուրսբերման դիմաց։ Միաժամանակ, ՀԱՄԱՍ-ը պահանջել է իսրայելական կողմի հետ գրավոր համաձայնագրի կնքում, որը կպարունակի Գազայի հատվածում ռազմական գործողությունների դադարեցման միջազգային երաշխիքներ։
Օգոստոսի 13-ին ՀԱՄԱՍ-ի պատվիրակությունը հայտարարել է, որ շարժումը ցանկանում է արագ վերադառնալ Գազայի հատվածում հրադադարի շուրջ բանակցություններին։
