Գյումրիում ռուսական ռազմաբազայի կարգավիճակի վերանայման վերաբերյալ Հայաստանի կողմից ազդակներ դեռևս չեն ստացվել։ Այս մասին RTVI-ին տված հարցազրույցում հայտարարել է ՌԴ արտաքին գործերի նախարարի տեղակալ Միխայիլ Գալուզինը։
Հարցազրույցից մի հատված հրապարակվում է ստորև.
— Գոյություն ունի նաև համաձայնագիր Գյումրիում ռուսական ռազմաբազայի վերաբերյալ, որի վարձակալության ժամկետը գործում է մինչև 2044 թվականը։ Արդյո՞ք այժմ կրկին կան որոշակի ազդակներ, որ այդ համաձայնագրի պայմանները կարող են վերանայվել, օրինակ՝ հօգուտ վարձավճարի բարձրացման, կամ ընդհանրապես այդ համաձայնագրի վերանայման։
-Գիտեք, հայկական կողմից նման ազդակներ դեռևս չեն ստացվել, և ավելին՝ հայկական կողմից պաշտոնական մակարդակով հայտարարվում է, որ Երևանը չի դիտարկում Գյումրիում ռուսական ռազմաբազայի դուրսբերման հարցը։
Մենք համոզված ենք, որ այս բազան հանդիսանում է թե՛ բուն Հայաստանի, թե՛ ընդհանուր առմամբ Հարավային Կովկասի անվտանգության ապահովման հենասյուներից մեկը։ Եվ մենք տեսնում ենք, որ, ցավոք, որոշ քաղաքական ուժեր և որոշ արևմտամետ հայկական ՀԿ-ներ փորձում են սևացնել Ռուսաստանի ռազմական ներկայությունը Հայաստանում՝ այն ներկայացնելով գրեթե որպես օկուպացիայի ինչ-որ գործիք կամ որպես Հայաստանի հանդեպ ինչ-որ փակվածության, այսպես ասած՝ ոչ բարեկամական վերաբերմունքի վկայություն։
Սակայն այդ բոլոր փորձերն ապարդյուն են. դրանք բախվում են ռուսական ռազմաբազայի նկատմամբ տեղի բնակչության բարյացակամ վերաբերմունքին, քանի որ այն ոչ միայն ռազմական օբյեկտ է, այլև յուրօրինակ ձգողականության կենտրոն տեղի բնակիչների համար։ Եվ դրա մասին է վկայում բաց դռների օրերին մեր բազա այցելած մասնակիցների մեծ թիվը, որոնցից վերջինը տեղի է ունեցել հունիսի 12-ին։
