Ֆրանսիայի վարչապետ Սեբաստիեն Լըկորնյուն տեղական իշխանություններին կոչ է արել այս երեկո մասնակի պարետային ժամ սահմանել՝ հանգստյան օրերին երկիրը ցնցած զանգվածային անկարգություններից հետո։
Լըկորնյուն լրագրողներին հայտնել է, որ «լի է հասարակական կարգը վերականգնելու վճռականությամբ»։ Նրա խոսքով՝ եթե արտակարգ դրություն հայտարարելու անհրաժեշտություն առաջանա, «մենք կարող ենք գնալ այդ քայլին»։ Սակայն այս փուլում մասնակի պարետային ժամը նա համարում է «առավել նպատակահարմար միջոց», փոխանցում է Reuters-ը։
Միևնույն ժամանակ, կառավարության ղեկավարը չի հստակեցրել, թե կոնկրետ որ քաղաքներում և ինչ ձևաչափով կգործեն այդ սահմանափակումները։ Դրա հետ մեկտեղ, նա բացառել է ամբողջ Փարիզի տարածքում պարետային ժամ մտցնելու հնարավորությունը։
«Այս սահմանափակումները պետք է լինեն տեղային և մասնակի։ Փարիզի ողջ տարածքում պարետային ժամ սահմանելու մասին խոսք լինել չի կարող», — ընդգծել է Լըկորնյուն։
Ներքին գործերի նախարար Լորան Նունյեսը, որը նույնպես ելույթ է ունեցել մամուլի ասուլիսի ընթացքում, հայտարարել է, որ իշխանությունները չեն պատրաստվում չեղարկել երեքշաբթի երեկոյան նախատեսված «Պարի Սեն-Ժերմեն» — «Բարսելոնա» ֆուտբոլային հանդիպումը։
Երկուշաբթի Ֆրանսիայի խոշորագույն քաղաքների ղեկավարները կառավարությունից բացատրություն են պահանջել այն բանի համար, ինչն իրենք բնորոշել են որպես անվտանգության ուժերի ոչ բավարար պատրաստվածություն անկարգություններին։ Երկիրը փորձում է ուշքի գալ հանգստյան օրերին տեղի ունեցած ջարդերից ու թալանից հետո։
Բողոքի ալիքը բռնկվել էր շաբաթներ տևած ուսանողական ցույցերից հետո, որոնք ժամանակ առ ժամանակ ուղեկցվում էին փողոցային բռնություններով։ Այս անկարգությունները ցնցեցին Ֆրանսիան հերթական նախագահական ընտրություններից ընդամենը վեց ամիս առաջ՝ է՛լ ավելի ուժգնացնելով իշխանությունների վրա գործադրվող ճնշումը թուլացած տնտեսության և պետական պարտքի կտրուկ աճի ֆոնին։
