ԱԺ «Հայաստան» խմբակցության պատգամավոր Գառնիկ Դանիելյանի ելույթը՝ խորհրդարանի ամբիոնից․

Սիրելի հայրենակիցներ, ուզում եմ ամբիոնից խոսել մեր սիրելի արցախցիների խնդիրների մասին, որոնք այս օրերին արժանապատվորեն պայքարում են իրենց իրավունքների համար՝ պահանջելով կառավարությունից վերանայել աջակցությունների դադարեցման որոշումը։

Խոսքը վերաբերում է հատկապես «40+10» ծրագրին, որը, ինչ-որ չափով մեղմում էր արցախցիների՝ կեցության հետ կապված կարիքները։

Ծրագրի դադարեցումը անթույլատրելի է․մայիսի 1-ից մեր հայրենակիցները չկարողանալով վճարել վարձավճարները՝ կարող են հայտնվել դրսում։ Սա հանգեցնելու է հուսալքության և արտագաղթի։

Այս ծրագրի փոխարեն կառավարությունը առաջարկում է օգտվել բնակարանային ապահովման ծրագրից, մինչդեռ, բազմիցս արձանագրվել է, որ այն ունի բազմաթիվ խոցելի կետեր, խրթին ընթացակարգ, ենթադրում է՝ ՀՀ քաղաքացիության պարտադիր ընդունում, վարկի ձևակերպում, ինչը, շատ դեպքերում մերժվում է բանկերի կողմից։ Հարց է ծագում, եթե պետությունն է այս ծրագրի երաշխավորը, վարկային պատմությունը դիտարկելուց հետո ինչու՞ են մերժվում մեր հայրենակիցները։

Պետք է ընդգծել, արցախցիներին արհեստականորեն և ապօրինաբար զրկել են ՀՀ քաղաքացիությունից և հարկադրում են, որպեսզի ծրագրի շահառու դառնալու համար վերջիններս նորից դիմեն քաղաքացիություն ստանալու համար։ Բնական է, որ շատերը վախեր, մտահոգություններ ունենալով չեն դիմում քաղաքացիության համար։ Մանավանդ, որ այս գործընթացը ևս վերածվել է քաշքշուկի ու բյուրոկրատիայի։ Պահանջում են բազմաթիվ փաստաթղթեր, որոնք բռնի տեղահանվածներից շատերը չեն բերել իրենց հետ։

Արցախցիների սոցիալական ծանր դրությունը մեղմելու համար կառավարության կողմից չեն սահմանվում արտոնություններ․ սկսած տրանսպորտի փաթեթներից որոշակի զեղչերով օգտվելուց՝ մինչև բժշկական ծառայությունների անվճար ապահովում։

Հարց է առաջանում․ բազմաթիվ դժվարությունների միջով անցած, մի քանի պատերազմ տեսած, հայրենիքից, տնից, տեղից, գույքից զրկված մեր հայրենակիցները ինչպե՞ս պետք է հոգան իրենց տարրական կարիքները, երբ զրկում եք անգամ այդ չնչին աջակցությունից։

Իրենց իրավունքների վերականգնման համար այս օրերին Արցախից բռնի տեղահանված մեր քույրերն ու եղբայրները ձևավորել են խորհուրդ, Ազատության հրապարակում տեղադրել վրաններ։

Կառավարությանը ներկայացվել է 12 կետից բաղկացած պահանջագիր, որտեղ խոսվում է ոչ միայն սոցիալական աջակցության ծրագրերի անհրաժեշտության մասին, այլ դրվում են հստակ պահանջներ՝ կապված ԵԱՀԿ Մինսկի խմբի լուծարումը չեղարկելու, Ադրբեջանի դեմ ներկայացված հայցերի հետ հետքաշումից հրաժարվելու, գերիների վերադարձի, արցախյան հիմնահարցի, վերադարձի իրավունքի վերաբերյալ։

Պետք է արձանագրել, որ այս բոլոր պահանջները միայն արցախցիները չեն․ սա բոլորիս արժանապատվության հարցն է։

Հետևաբար, ինչպես Հայաստանի Հանրապետությունը, այնպես էլ՝ մենք, յուրաքանչյուրս, մեր հնարավորությունների սահմաններում, պետք է աջակցենք, սատարենք, զորավիգ լինենք արցախցիներին։

Եվ այն անձինք, որոնք ատելության խոսք կհնչեցնեն, պետք է ենթարկվեն ամենախիստ պատասխանատվության․ կլինեն պարզապես ֆեյսբուքյան օգտատերեր, թե պետական պաշտոնյաներ։

Պատգաավորի ելույթը՝ տեսանյութում։