ԱՄՆ Կոնգրեսի երկու պալատներում վերահսկողություն ստանալուց հետո դեմոկրատները մտադիր են վերանայել երկրի արտաքին քաղաքականության մի շարք ուղղություններ և սահմանափակել ԱՄՆ նախագահ Դոնալդ Թրամփի գործողությունների ազատությունը։ Այս մասին նոյեմբերի 4-ին հայտնել է Reuters գործակալությունը։
«Դեմոկրատների շարքերում Իսրայելի նկատմամբ աջակցությունը կտրուկ նվազել է Գազայի հատվածում մղվող պատերազմում վերջինիս գործողությունների պատճառով, որոնց հետևանքով տասնյակ հազարավոր պաղեստինցի խաղաղ բնակիչներ են զոհվել։ Դեմոկրատները կարող են սահմանափակել կամ ամբողջությամբ դադարեցնել Իսրայելին տրամադրվող ռազմական օգնությունը, որի բազային ծավալը տարեկան կազմում է 3,8 մլրդ դոլար», — նշվում է հրապարակման մեջ։
Բացի այդ, կուսակցությունն ակնկալում է հասնել Ուկրաինային աջակցության նոր փաթեթի տրամադրմանը։ Երկու պալատների նկատմամբ վերահսկողությունը դեմոկրատներին թույլ կտա ինքնուրույն որոշել, թե որ օրինագծերը պետք է դրվեն քվեարկության։ Առանցքային ուղղություններից մեկն էլ կլինի Իրանի նկատմամբ քաղաքականությունը։ Դեմոկրատները կարող են Թրամփից պահանջել, որպեսզի հետագա ռազմական գործողությունները համաձայնեցվեն Կոնգրեսի հետ՝ հակառակ դեպքում սպառնալով կրճատել պաշտպանական ծախսերն ու արգելափակել նշանակումները։
Մյուս կարևոր ուղղություններից են ռազմական բյուջեի աճի սահմանափակումը, Թրամփի վարչակազմի կողմից կրճատված արտաքին օգնության ծրագրերի վերականգնումը, ինչպես նաև Լատինական Ամերիկայում Վաշինգտոնի վարած քաղաքականության նկատմամբ վերահսկողության խստացումը։ Մասնավորապես, դեմոկրատները մտադիր են հասնել Վենեսուելայում ԱՄՆ-ի գործողությունների ուսումնասիրությանը և դեմ են արտահայտվում Կուբայի նկատմամբ պատժամիջոցներին։
