«Մենք մեր դիմումի շրջանակներում ներկայացրել ենք զանգվածային բնույթ կրող այն ընտրախախտումների խումբը, որոնք բաժանել էինք մի քանի փուլերի՝ նախընտրական շրջան, քվեարկության օր և դրան հաջորդած ժամանակահատվածում լիազոր մարմնի ակնհայտ ոչ իրավաչափ գործողություններ:

Բա՛րձր դատարան, կարծում եմ՝ տեղին է հիշատակել հենց Սահմանադրական դատարանի հիմնադիր նախագահ պարոն Հարությունյանի խոսքերից մեկը, որ Հայաստանի Հանրապետությունում կա Սահմանադրություն, բայց չկա սահմանադրականություն: Կարծում եմ՝ այս խոսքերը 2026 թվականին՝ հենց այս ընտրությունների արդյունքների վիճարկման շրջանակներում, շատ ավելի մեծ իմաստ են ձեռք բերել:

Մենք դատաքննության ընթացքում պարզեցինք մի քանի կարևոր հանգամանք: Պարզեցինք, որ գործով պատասխանողը մի շարք հարցերի վերաբերյալ պատասխան չունի: Դատաքննության ընթացքում տեսանք, թե ինչպես է հնարավոր հարցերին չպատասխանել: Կարծում եմ՝ սահմանադրական արդարադատության շրջանակներում մենք առաջին անգամ ականատեսը եղանք նրան, որ պատասխանողը Սահմանադրական դատարանում օգտվեց փաստացի լռելու իրավունքից, երբ Բարձր դատարանի դատավորներից մեկի ուղիղ հարցադրմանը որևէ պատասխան չտրվեց:

Բա՛րձր դատարան, մենք գտնում ենք, որ այս ընտրությունները չեն համապատասխանել Սահմանադրության 7-րդ հոդվածին. դրանք չեն եղել ազատ և չեն եղել հավասար»,- այս մասին ՍԴ-ի իր ամփոփիչ ելույթում նշեց «Ուժեղ Հայաստան» կուսակցության ներկայացուցիչ, փաստաբան Արամ Վարդևանյանը։

Մանրամասն՝ տեսանյութում։