Հակակոռուպցիոն դատարանում՝ Վահե Դոլմազյանի նախագահությամբ, շարունակվում է գործարար, բարերար Սամվել Կարապետյանի նկատմամբ կալանքը երկարաձգելու վերաբերյալ դատական նիստը։
Դատական նիստը մեկնարկել էր երեկ՝ հոկտեմբերի 14-ին, աշխատանքային օրվա ավարտին և մոտ 8 ժամ անց՝ գիշերը, հետաձգվել։
Կարապետյանի փաստաբանական խումբը հայտարարել էր․ «2025 թ. հոկտեմբերի 13-ին՝ աշխատանքային օրվա ավարտին, Հակակոռուպցիոն դատարանից տեղեկացվեցինք, որ ազգային բարերար, գործարար Սամվել Կարապետյանի կալանքի երկարաձգման միջնորդությունը մակագրվել է դատավոր Վ. Դոլմազյանին:
Հիշեցնենք, որ քննիչի կողմից այն ներկայացվել էր դեռևս հոկտեմբերի 11-ին, և այսքան տևական ժամանակ պահանջվեց մակագրման «թեկնածու» գտնելու համար: Դատավորը, ում մակագրվել է այս ակնհայտ անհիմն միջնորդությունը, հանրությանը հայտնի է որպես հնչեղություն ստացած գործերով, բացառապես իշխանահաճո որոշումներ կայացնող Դատավոր:
Առավել ուշագրավ է այն, որ Դատավորը, ստանալով նյութերը, արդեն իսկ էական խախտում է թույլ տվել՝ 24 ժամից պակաս ժամկետում նիստ նշանակելով:
Ի դեպ, հրատապության հարցը սույն դեպքում առհասարակ բացակայում էր, քանի որ կալանքի ժամկետը լրանում էր հոկտեմբերի 18-ին:
Այս գործողությունները ևս որևէ իրավական տրամաբանությունից դուրս են: Սամվել Կարապետյանի նկատմամբ քաղաքական հետապնդման անվիճելի հանգամանքը հաստատված է. իրավունքների նման ծավալի կոպիտ խախտումներն ակնառու են և աննախադեպ»։
Նշենք, որ Սամվել Կարապետյանը կալանավորվել է եկեղեցուն աջակցող խոսքերի համար։
Բազմաթիվ քաղաքացիներ հավաքվել են դատարանի բակում իրենց աջակցությունը հայտնելու ազգային բարերարին։
Մանրամասները՝ ուղիղ հեռարձակմամբ։
