Երբ ԱՄՆ նախագահ Դոնալդ Թրամփը ներկայացրել է իր «Խաղաղության խորհուրդը» (Council of Peace)՝ միայն հրավիրյալների համար նախատեսված երկրների մի խումբ, որը խոստանում է նպաստել համաշխարհային կայունությանը՝ անմիջապես հեգնանք ի հայտ եկավ։ Այս մասին The Washington Times պարբերականի խմբագրության համար գրում է հոդվածի հեղինակ Ստեփան Փեչդիմալջին:
Հեղինակն ընդգծում է, որ խմբի կազմում որևէ երկրի ներառումն այնքան խորը կեղծավորություն չէր կարող լինել, որքան Ադրբեջանի դեպքը։ Սա մի երկիր է, որը տարիներ շարունակ օգտագործել է իր հսկայական բնական պաշարները՝ մարդու իրավունքների և օրենքի գերակայության ճնշման ոլորտում իր սարսափելի վարկանիշը «սպիտակեցնելու» համար։
«Նրանց համար, ովքեր հետևում են Հարավային Կովկասի իրադարձություններին, «Խաղաղության խորհրդի» վերջերս կայացած անդրանիկ գագաթնաժողովի ժամանակ Վաշինգտոնում Ադրբեջանի նախագահ Իլհամ Ալիևին խաղաղության հասնելու համար գովաբանելու տեսարանը ոչ թե դիվանագիտական հաղթանակ է, այլ միջազգային հանրության ղեկավարության բարոյական ձախողումը։ Հայաստանի հետ 30-ամյա հակամարտությունից հետո Ադրբեջանը չի կարողացել խաղաղության հասնել երկխոսության, բանակցությունների կամ դիվանագիտության միջոցով։ Նա իր նպատակներին հասել է 2023 թվականի ռազմական հարձակման միջոցով՝ նախքան Լեռնային Ղարաբաղի ողջ հայ բնակչությանը իրենց տներից վտարելը՝ նրանց ամիսներ շարունակ սովի մատնելով շրջափակման միջոցով։ Սա «խաղաղություն» անվանել՝ նշանակում է վերիմաստավորել այդ բառը՝ տալով դրան լիակատար հնազանդության նշանակություն»,- գրում է Փեչդիմալջին։
Հոդվածի հեղինակը հիշեցնում է, որ Լեռնային Ղարաբաղի զավթումից ի վեր Ադրբեջանը չի խոսում և չի պահում իրեն որպես խաղաղության ձգտող երկիր։
«Նա ավելի շատ նման է մի երկրի, որը ցանկանում է տիրանալ Հայաստանին։ Ադրբեջանը շարունակում է ապօրինի կերպով, առանց որևէ պատշաճ իրավական ընթացակարգի, անազատության մեջ պահել հայ գերիներին, այդ թվում՝ մարդասեր Ռուբեն Վարդանյանին։ Այն շարունակում է կործանել հայկական եկեղեցիներն ու պատմական այլ հուշարձանները՝ փորձելով երկրի երեսից ջնջել տարածաշրջանում հայկական ցանկացած ներկայություն, և շարունակում է Հայաստանն անվանել «Արևմտյան Ադրբեջան»։
Հեղինակն ընդգծում է, որ շատ առումներով «Խաղաղության խորհուրդը» զուտ ներկայացուցչական քաղաքական թատրոն է, որը նպատակ ունի ուժը վեր դասել սկզբունքներից։ Միանալով այս խորհրդին՝ պարոն Ալիևը շարունակում է պարոն Թրամփի վստահությունը շահելուն ուղղված իր ջանքերը։ «Այն փաստը, որ Ադրբեջանը ներառված է «Խաղաղության խորհրդում», նրան խաղաղարար երկիր չի դարձնում։ Սա պարզապես ցույց է տալիս, թե որքան հեշտությամբ կարելի է գնել, վաճառել և մանիպուլյացիայի ենթարկել խաղաղության գաղափարը՝ ավտորիտար նպատակներին ծառայեցնելու համար»,- եզրափակում է Փեչդիմալջին։
