Երևանի քաղաքապետ Տիգրան Ավինյանը հայտարարագրել է մեկ բնակարան Կենտրոն վարչական շրջանում։ «Փաստինֆո»-ի հաղորդմամբ՝ տվյալները վերցված են Կոռուպցիայի կանխարգելման հանձնաժողով ներկայացված հայտարարագրից։
Հայտարարագրում նշված է նաև 2021 թվականի արտադրության VOLKSWAGEN մակնիշի ավտոմեքենա, որը ձեռք է բերվել 2022 թվականին։
Ֆինանսական միջոցների մասով՝ 2025 թվականի սկզբին Ավինյանը ունեցել է 13 միլիոն 711 հազար 998 դրամ, իսկ տարվա վերջում՝ 5 միլիոն 858 հազար 209 դրամ։
Նա հայտարարագրել է նաև 3 կրիպտոարժույթ՝ ADA Cardano, Ethereum և Bitcoin։
Նույն տարվա ընթացքում կանխիկ միջոցները սկզբում կազմել են 24 միլիոն 430 հազար դրամ, իսկ տարեվերջին՝ 20 միլիոն 887 հազար 335 դրամ։
Այլ եկամուտների մասով Ավինյանը հայտարարագրել է ընդհանուր 57 միլիոն 671 հազար 356 դրամ, որի մի մասը Երևանի քաղաքապետարանից ստացած աշխատավարձն է, իսկ մյուս մասը՝ այլ եկամուտներ, այդ թվում՝ Poolin-ից։ Նախորդ տարվա համեմատ նրա եկամուտները աճել են․ 2024-ին դրանք կազմել են 54 միլիոն 624 հազար 109 դրամ։
Ավինյանի կինը՝ Մարիամ Պահլավունին, ունի մասնակցություն երկու ընկերություններում՝ «Բարուր» ՍՊԸ-ում՝ 100 տոկոս, և «Լավ փրոդաքթս»-ում՝ 34 տոկոս։
Տիգրան Ավինյանը նաև Հայաստանի վերականգնվող էներգետիկայի և էներգախնայողության հիմնադրամի հոգաբարձուների խորհրդի նախագահ է, ինչպես նաև «Հայաստանի ազգային պոլիտեխնիկական համալսարան» հիմնադրամի հոգաբարձուների խորհրդի նախագահ։
Նա նաև «Քաղաքացիական պայմանագիր» կուսակցության վարչության անդամ է և այս օրերին ակտիվորեն մասնակցում է քարոզարշավին՝ շրջելով Երևանի վարչական շրջաններով։
