Հակակոռուպցիոն դատարանում ավարտվել է Գեղամ Զաքարյանի կալանավորման վերաբերյալ միջնորդության քննությունը. դատարանը որոշել է քննիչի միջնորդությունը բավարարել մասնակի և Գեղամ Զաքարյանի նկատմամբ կիրառել տնային կալանք՝ 2 ամիս ժամկետով, այդ ընթացքում սահմանափակելով նաև նրա շփվելու իրավունքը բոլոր անձանց հետ՝ բացառությամբ մերձավոր ազգականների։ Այս մասին իր տեսաուղերձում ասել է արցախցի փաստաբան Ռոման Երիցյանը՝ տեղեկացնելով, որ Գեղամ Զաքարյանն այն նույն անձն է, որն Արթուր Ավանեսյանի (Կանդազի) գործով մեղադրվում է ընտրակաշառքի մեջ։
«Դատարանի որոշումը դեռ չեմ ստացել, այլ միայն քաղվածքը։ Որոշման եզրափակիչ մասի ուսումնասիրությունը բավարար է դատարանի որոշումը որակելու որպես ակնհայտ անհիմն, ապօրինի և անօրինական, որովհետև դատարան է ներկայացվել մի այնպիսի միջնորդություն, որը պետք է մերժվեր առհասարակ հիմնավոր կասկածի բացակայության հիմքով։ Հիշեցնում եմ, որ, ըստ ձայնագրությունների, Գեղամ Զաքարյանը, իբրև թե, ինչ-որ անորոշ ընտրակաշառքի դիմաց տվել է իր և իր ընտանիքի անդամների ձայնը «Ուժեղ Հայաստան» կուսակցության օգտին տալու խոստում, այն դեպքում, երբ պարզվել է, որ Գեղամ Զաքարյանի ընտանիքի անդամներից չորսը, այսինքն, բացի իրենից մնացածը չունեն անգամ Հայաստանի Հանրապետության քաղաքացիություն և օժտված չեն անգամ պասիվ ընտրական իրավունքով՝ նրանք ձայն տալու իրավունք չունեն։ Ոչ միայն չունեն ՀՀ քաղաքացիություն, այլ՝ նույնիսկ չեն էլ դիմել։ Նրանք հանդիսանում են Արցախի Հանրապետության քաղաքացիներ»,- մանրամասնեց փաստաբանը։
Ռ. Երիցյանի փոխանցմամբ՝ կարողացել են հասնել նրան, որ Գեղամ Զաքարյանի նկատմամբ նշանակվի ոչ թե բանտային, այլ՝ տնային կալանք։
«Բայց այս ընթացքում Արցախից բռնի տեղահանված 5 հոգուց բաղկացած ընտանիքի միակ խնամակալը, զրկված լինելով աշխատանքից, ստիված է լինելու մնալու տանը, որևէ անձի հետ չշփվել, որևէ գործողություն չձեռնարկել, այն դեպքում, երբ անձը երեք պատերազմների մասնակից է, երկու անգամ ականի պայթյունի հետևանքով ստացել է ծանր վիրավորումներ, ամբողջ մարմինը բեկորային վնասվածքներով, մարմնում կան տարբեր բեկորներ։ Ընդամենը ասել է՝ լինելու է իր մարտական ընկեր Արթուր Ավանեսյանի հետ և հետագայում ակնկալում է աշխատանք»,- ասաց նա և հավելեց, որ այդ ամենը նախատեսված է կուսակցության նախընտրական ծրագրով։
