Իրանի արտաքին գործերի նախարար Աբբաս Արաղչին Թեհրանում հանդիպել է Պակիստանի ներքին գործերի նախարար Մոհսին Նաքվիի հետ։ Այս մասին հայտնել է Իրանի արտաքին գործերի նախարարությունը։
Նաքվին Իրանի մայրաքաղաք է ժամանել՝ երկրի բարձրաստիճան պաշտոնյաների հետ բանակցություններ անցկացնելու նպատակով։ Այցը տեղի է ունենում տարածաշրջանում շարունակվող դիվանագիտական ակտիվության ֆոնին, որտեղ Պակիստանը միջնորդական դեր է ստանձնել Իրանի և Միացյալ Նահանգների միջև բանակցություններում։
Պակիստանի ներքին գործերի նախարարի այցի օրակարգում են Իրանի հետ խորհրդակցությունները, այդ թվում՝ տարածաշրջանային իրավիճակին և դիվանագիտական գործընթացին վերաբերող հարցերը։ Al Jazeera-ի փոխանցմամբ՝ այցը նաև կապված է Իրանի շուրջ հակամարտության կարգավորման և Հորմուզի նեղուցի վերաբացման ուղղությամբ իրականացվող միջնորդական ջանքերի հետ։
Հանդիպման վերաբերյալ այլ մանրամասներ Իրանի արտաքին գործերի նախարարությունը դեռևս չի հրապարակել։
