Ադրբեջանը սադրիչ է համարել Ֆրանսիայի ԱԳ նախարար Ժան-Նոել Բարոյի հայտարարությունը Արցախի մասին: Ադրբեջանի արտաքին գործերի նախարարության մամուլի քարտուղար Այխան Հաջիզադեն հայտարարել է, որ կտրականապես մերժում են Ֆրանսիայի ԱԳՆ-ի՝ մայիսի 6-ին Ֆրանսիայի խորհրդարանում հնչեցրած հայտարարությունները՝ ուղղված Ադրբեջանի դեմ, հաղորդում է Apa գործակալությունը:
«ՅՈՒՆԵՍԿՕ-ի գնահատող առաքելություն «Ադրբեջանի Ղարաբաղյան տարածաշրջան» ուղարկելու վերաբերյալ Ֆրանսիայի կոչերը իրականության ակնհայտ խեղաթյուրում են։ Հենց Ադրբեջանն է բազմիցս կոչ արել իրականացնել նման գնահատող առաքելություններ, սակայն, ցավոք, դրանց անցկացումն անհնարին է դարձել հենց այնպիսի երկրների կողմից հայտնի խոչընդոտների արդյունքում, ինչպիսիք են Հայաստանը և Ֆրանսիան։ Ինքը՝ ՅՈՒՆԵՍԿՕ-ն, հաստատել է այս փաստը իր 2005 թվականի զեկույցում։ Ֆրանսիացի նախարարի նման հայտարարությունները չեն ծառայում տարածաշրջանում կայուն և իսկական խաղաղության կառուցմանը»,- հայտարարել է Ադրբեջանի ԱԳՆ ներկայացուցիչը։
