Վերջին շաբաթներին Ադրբեջանի, մասնավորապես՝ նախագահ Իլհամ Ալիեւի եւ նրա ընտանիքի դեմ սկսված համակարգված արշավը սոցիալական ցանցերում պատահական հուզական պոռթկումների հավաքածու չէ։ Դա համակարգված, պլանավորված եւ կենտրոնացված տեղեկատվական սադրանք է, որի հետքերն ուղիղ տանում են Կրեմլ։
Ինչպես տեղեկացնում է «Оперативный Информационный Центр-OMM»-ը, այս մասին հայտնել է լրագրող Էլչին Ալիօղլուն։ Նշվել է, որ այս գործընթացը նշանավորում է Ռուսաստանի կողմից Ադրբեջանի դեմ վարվող հիբրիդային պատերազմի նոր փուլը։
Հոդվածի հեղինակը նշում է, որ եթե նախորդ փուլում կիբեռհարձակումներն էին հիմնական գործիքը, ապա այժմ հիմնական գործիք է դարձել տեղեկատվական ահաբեկչությունը։ Մեծածավալ կիբեռհարձակումներ են իրականացվել պետական մարմինների, լրատվամիջոցների եւ ենթակառուցվածքների դեմ։ Ադրբեջանական կողմը բավարար տեղեկատվություն ունի այդ հարձակումների տեխնիկական կառուցվածքի, օգտագործված սերվերային շղթաների եւ համակարգման կենտրոնների մասին։ Սակայն այժմ մարտավարությունը փոխվել է. նպատակը հասարակության հոգեբանական կայունությունն է։
«Ադրբեջանն ուշադիր հետեւում է իրադարձությունների զարգացմանը։ Բաքուն տեղյակ է ինչպես Ռուսաստանի վերջին, այնպես էլ նախատեսվող քայլերին։ Միամտություն կլինի հավատալ, որ այդ սադրանքներն անպատասխան կմնան։ Պետությունը կառուցել է իր սեփական անվտանգության ճարտարապետությունը եւ ունի համարժեք տեղեկատվական արձագանքի մեխանիզմներ։
Չնայած հիբրիդային պատերազմը մղվում է անաղմուկ, դրա հետեւանքները կարող են աղմկալի լինել։ Կրեմլը պետք է իմանա. Ադրբեջանն այլեւս այն չէ, ինչ նախկինում էր, եւ ճնշման լեզուն այստեղ անարդյունավետ է։ Ադրբեջանը լավ գիտակցում է Ռուսաստանի հաջորդ քայլը եւ վաղվա ծրագրածը։ Թող ոչ ոք չխաբի ինքն իրեն։
Եթե Մոսկվայում որեւէ մեկը կարծում է, որ այս սադրանքներն անպատասխան կմնան, դա վտանգավոր պատրանք է։ Ադրբեջանը մերժում է ճնշումը եւ չի ներում կուլիսային մարտավարությունը։ Յուրաքանչյուր քայլին կհաջորդի պատասխան միջոց։
Հարկ է նշել, որ հիբրիդային պատերազմի հայեցակարգը ներառում է ավանդական ռազմական գործողությունների համադրություն կիբեռհարձակումների, ապատեղեկատվության եւ տնտեսական ճնշման հետ, որոնք ուղղված են իրավիճակի անկայունացմանը երկրի ներսում»,- գրում է «Оперативный Информационный Центр-OMM»-ը։
