Հայաստանի և Ադրբեջանի միջև ընթանում են սահմանազատման և սահմանագծման աշխատանքներ։ Ըստ ԱՊԱ-ի, այս մասին լրագրողների հետ զրույցում հայտարարել է Ադրբեջանի արտգործնախարար Ջեյհուն Բայրամովը։
Բայրամովը հայտարարել է, որ այս ոլորտում ստեղծվել են հանձնաժողովներ. «Այս աշխատանքը շարունակվում է կանոնավոր կերպով։ Մենք արդեն ականատես ենք եղել այս աշխատանքի առաջին դրական արդյունքներին. պետական սահմանի մոտ 13 կմ հատվածը սահմանազատվել է»։
Նա նշել է, որ երկու կողմերի միջև որոշակի համաձայնություններ են ձեռք բերվել. «Սահմանազատման գործընթացը կշարունակվի հյուսիսից հարավ։ Գործընթացը կիրականացվի, և կլուծվեն էքսկլավային գյուղերի հարցերը»,- ասել է նա։
Խոսելով խաղաղության համաձայնագրի մասին Ադրբեջանի ԱԳ նախարարը նշել է, որ ադրբեջանական կողմն ավարտել է խաղաղության համաձայնագրի վերջնական մշակման աշխատանքների իր մասը։
Նա նշել է, որ Վաշինգտոնի գագաթնաժողովում Հայաստանի և Ադրբեջանի միջև ստորագրվել է համատեղ հայտարարություն. «Խաղաղության համաձայնագրի տեքստն արդեն նախաստորագրվել է և բաց է հանրության համար: Ադրբեջանի մոտեցումն այս հարցում սկզբունքային է: Նախագահ Իլհամ Ալիևը արտահայտել է պետության պաշտոնական դիրքորոշումը»,- ասել է նա՝ կրկին պնդելով, թե իբր «ՀՀ Սահմանադրության մեջ Բաքվի նկատմամբ տարածքային պահանջներ կան, և որոնք պետք է հեռացվեն» և դրանից հետո միայն կստորագրվի խաղաղության համաձայնագիրը:
