Ֆրանսիայի Սենատն ընդունել է բողոքի ցույցերի մասնակիցների կոլեկտիվ պատասխանատվության մասին օրինագիծը։
Ֆրանսիայի խորհրդարանի վերին պալատը նախաձեռնությանն աջակցել է 229 կողմ և 105 դեմ ձայներով։
Օրինագիծը նախատեսում է ցույցերի ընթացքում պատճառված վնասի համար պատասխանատվություն դնել նաև այն մասնակիցների վրա, որոնք անմիջականորեն ներգրավված չեն եղել վնաս պատճառելու գործում։ Նրանցից կարող են գանձել մինչև 10 հազար եվրո։
Օրինագիծը կտրուկ քննադատության է արժանացել ձախակողմյան կուսակցությունների կողմից, որոնք կարծում են, որ այն ոտնձգություն է ցույցերին մասնակցելու ազատության նկատմամբ։ Գրում է Րիա նովոստին։
«Էկոլոգներ» կանաչների կուսակցության սենատոր Մելանի Վոժելն հայտարարել է, որ փաստաթուղթը հակասում է Սահմանադրությանը, իսկ խաղաղ ցուցարարներին փորձում են քավության նոխազ դարձնել։
Այժմ փաստաթուղթը կքննարկվի խորհրդարանի ստորին պալատում՝ Ազգային ժողովում։
Ֆրանսիայում բողոքի ցույցերը շարունակվում են սեպտեմբերի կեսերից։ Այդ ժամանակ Փարիզի արվարձանների ավագ դպրոցների աշակերտներն ու ուսանողները դուրս էին եկել փողոց՝ պահանջելով բարելավել ուսման պայմանները։ Ավելի ուշ նրանց միացել էին նաև գների աճից դժգոհ բնակիչները, իսկ ցույցերը տարածվել էին երկրի այլ շրջաններում։
Ամենամարդաշատը հոկտեմբերի 17-ին տեղի ունեցած համազգային ցույցն էր, որն ուղեկցվել էր անկարգություններով և ջարդերով։ Թալանչիները կողոպտել էին խանութները, կոտրել ցուցափեղկերը, հրկիզումներ իրականացրել և բախվել ոստիկանության հետ։ Պաշտոնական տվյալներով՝ ցույցին մասնակցել էր շուրջ 550 հազար մարդ։
