Ադրբեջանի արտաքին գործերի նախարար Ջեյհուն Բայրամովի և ԱՄՆ պետքարտուղար Մարկո Ռուբիոյի միջև հեռախոսազրույց է տեղի ունեցել։

Հոկտեմբերի 5-ին կայացած հեռախոսազրույցի ընթացքում կողմերը քննարկել են Ադրբեջանի և ԱՄՆ-ի միջև ռազմավարական գործընկերության երկկողմ հարաբերությունների ներկա վիճակն ու զարգացման հեռանկարները, ինչպես նաև Ադրբեջանի և Հայաստանի միջև հարաբերությունների կարգավորման գործընթացը։

Կողմերն ընդգծել են երկկողմ հարաբերություններում ռազմավարական գործընկերության զարգացման ուղղությամբ արձանագրված առաջընթացը, որը ձեռք է բերվել 2025 թվականի օգոստոսի 8-ին Վաշինգտոնում կայացած գագաթնաժողովից հետո։

Ընդգծվել է նաև Ադրբեջանի և ԱՄՆ-ի միջև ռազմավարական գործընկերության խարտիայով սահմանված առաջնահերթ ուղղություններով աշխատանքային խմբերի գործունեության կարևորությունը՝ երկկողմ համագործակցության հետագա խորացման գործում։

Հեռախոսազրույցի ընթացքում անդրադարձ է կատարվել նաև 2026 թվականին Ադրբեջանի և ԱՄՆ-ի ռազմավարական գործընկերության շրջանակում ձեռք բերված արդյունքներին։ Նշվել է, որ Բաքվի էներգետիկ շաբաթվա և Ադրբեջանի II միջազգային ներդրումային համաժողովի շրջանակում էներգետիկայի, ածխաջրածնային ռեսուրսների հետախուզման, մշակման և արդյունահանման, ներդրումների, թվային տեխնոլոգիաների, առևտրի և այլ ոլորտներում ստորագրված փաստաթղթերը զգալիորեն ընդլայնել են համագործակցության գործնական բովանդակությունը։

Ջեյհուն Բայրամովը ԱՄՆ պետքարտուղարին տեղեկացրել է խաղաղության օրակարգի առաջմղման, վստահության ամրապնդման և տարածաշրջանային կայունության ապահովման ուղղությամբ Ադրբեջանի ձեռնարկած քայլերի մասին։

Կողմերը մտքեր են փոխանակել նաև փոխադարձ հետաքրքրություն ներկայացնող այլ հարցերի շուրջ։