Թուրքիան Հունաստանին պաշտոնական դիվանագիտական նոտա է հղել Էվրոս գետի երկայնքով արգելապատնեշի կառուցման պատճառով՝ հայտարարելով, որ ցանկապատի առանձին հատվածներ կառուցվում են թուրքական տարածքում, հաղորդում է հունական Kathimerini թերթը։
Խոսքը վերաբերում է Էվրոսի շրջանի կենտրոնական մասին, որտեղ 35 կիլոմետրանոց ցանկապատի հատվածի կառուցումը սկսվել է 2023 թվականին և ավարտվել 2025-ի սկզբին։ Սակայն մոտ յոթ հատվածներում, որոնց ընդհանուր երկարությունը շուրջ 5 կիլոմետր է, աշխատանքները դադարեցվել են սահմանի անցման շուրջ տարաձայնությունների պատճառով։
Հունական ռազմական քարտեզները վիճելի տարածքները վերագրում են Հունաստանին, մինչդեռ Թուրքիան դրանք համարում է իր տարածքը։ Վեճի պատճառներից մեկը դարձել է Էվրոս գետի հունի փոփոխությունը, որը զգալի հատվածում ծառայում է որպես սահման երկու երկրների միջև։
Լրացուցիչ տարաձայնություններ են առաջացել այն բանից հետո, երբ 2024 թվականին Հունաստանը սկսել է սահմանի վերաբերյալ տվյալները թվային ձևաչափի փոխակերպել։ Մինչև այդ օգտագործվում էին 1926 թվականի անալոգային չափումների վրա հիմնված քարտեզները։ Դիվանագիտական աղբյուրների վկայությամբ, հին և թվային քարտեզների միջև հայտնաբերվել են փոքր անհամապատասխանություններ, որոնք պետք է համաձայնեցնեն երկու երկրների տեխնիկական ծառայությունները։
Մոտ հինգ ամիս առաջ հունական իշխանությունները որոշել են ավարտել վիճելի հատվածներում ցանկապատի կառուցումը՝ առաջնորդվելով հունական քարտեզներով։ Նախկինում քննարկված տեղափոխվող արգելապատնեշի փոխարեն այնտեղ սկսել են տեղադրել մշտական կառույց՝ հիմնակմախքով։
Հենց այս որոշումն էլ դարձել է Անկարայի պաշտոնական բողոքի պատճառը։ Դիվանագիտական նոտան փոխանցվել է Հունաստանի, Թուրքիայի և Բուլղարիայի կապի կետի միջոցով Կապիտան-Անդրեևո սահմանային անցակետում։
