Երևանի ընդհանուր իրավասության քրեական դատարանի «Ավան» նստավայրից փախուստի դիմած կալանավորի նկատմամբ հարուցվել է հանրային քրեական հետապնդում՝ Քրեական օրենագրքի 506-րդ հոդվածի 1-ին մասով (արգելանքի վերցված, ձերբակալված, կալանավորված կամ քրեակատարողական հիմնարկում պատիժ կրող անձի փախուստը կամ ազատությունից զրկելու հետ կապված պատիժը կրելուց խուսափելը): Այս մասին «Փաստինֆո»-ի փոխանցմամբ հայտնել են ՔԿ-ից։
Նշենք, որ իրավապահներին առ այս պահը չի հաջողվել հայտնաբերել շուրջ մեկ ամիս առաջ դատարանից փախուստի դիմած անձին, որը գուցե անգամ լքել է ՀՀ տարածքը։
Հիշեցնենք, որ օգոստոսի 3-ին «Ավան» նստավայրից կալանավորը դիմել էր փախուստի։ Պարզվել էր, որ նախաձեռնված քրեական վարույթի շրջանակում բացակայելու արգելք խափանման միջոցն ընտրված անձի նկատմամբ կայացվել է դատավճիռ, որով որպես պատիժ նշանակվել է ազատազրկում, սակայն մինչ դատավճռի օրինական ուժի մեջ մտնելը նրա նկատմամբ որպես խափանման միջոց ընտրվել է կալանքը։
Դատական նիստի ավարտից հետո վերջինս նիստերի դահլիճից դիմել է փախուստի։ Դատական կարգադրիչների նկատմամբ նշանակվել է ծառայողական քննություն։
Քննչական կոմիտեում դեպքի առթիվ նախաձեռնվել է քրեական վարույթ՝ Քրեական օրենսգրքի 506-րդ հոդվածի 1-ին մասով՝ արգելանքի վերցված, ձերբակալված, կալանավորված կամ քրեակատարողական հիմնարկում պատիժ կրող անձի փախուստը կամ ազատությունից զրկելու հետ կապված պատիժը կրելուց խուսափելը, և 446-րդ հոդվածի 1-ին մասով՝ պաշտոնեական անփութությունը։
