Բաքուն և Երևանը երկարամյա հակամարտության ավարտից հետո աշխատում են փոխադարձ առևտրի զարգացման, դրա տեսականու ընդլայնման և նոր ցամաքային տրանսպորտային հաղորդակցությունների ստեղծման ուղղությամբ։ Այս մասին հայտարարել է Ադրբեջանի նախագահ Իլհամ Ալիևը՝ ելույթ ունենալով Բիշքեկում։
«Մեկ տարուց մի փոքր ավելի առաջ Ադրբեջանն ու Հայաստանը վերջ դրեցին ավելի քան 30 տարի տևած հակամարտությանը՝ նախաստորագրելով խաղաղության համաձայնագրի տեքստը։ Այսպիսով, Հարավային Կովկասը, որը երկար տարիներ հակամարտության գոտի էր, վերածվում է խաղաղության գոտու հայտարարել է Ալիևն ու հասցրել թերագնահատել ՄԱԿ-ի դերակատարությունը։
«ՄԱԿ-ի Անվտանգության խորհրդի 1993 թվականին ընդունված 4 բանաձևերը կյանքի կոչվեցին 30 տարի անց՝ երեք տարի առաջ։ Ցավոք, ՄԱԿ-ը որևէ դեր չի խաղացել այդ բանաձևերի իրականացման գործում։ Ադրբեջանն ինքնուրույն և լիովին վերականգնել է իր ինքնիշխանությունն ու տարածքային ամբողջականությունը»,-հայտարարել է Ալիևը։
