«Ո՞վ է գողացել ԲՀԿ-ի մանդատները։
Մի քանի օր շարունակ այս քննարկումը ծավալվում է Ազգային ժողովում և, ինչպես և խոստացել էի Ձեզ, հազար անգամ հարցը բարձրաձայնեք՝ հազար անգամ գալու եմ և այս բարձր ամբիոնից հայտարարելու եմ՝ Դուք, Ձեր իշխանությունը գողացել է 60 հազար քաղաքացու ձայն, Դուք գողացել եք ընդդիմադիր մանդատներ։
Այստեղ ֆուտբոլային տրամաբանությամբ շատ խոսվեց իրավիճակը նկարագրելու համատեքստում։ Եթե խաղադաշտում ԲՀԿ-ն է և ՔՊ-ն, իսկ մրցավարը նախկին ՔՊ-ական, կարկառուն ՔՊ-ական Վահագն Հովակիմյանն է, միանշանակ հաղթողը լինելու է «Քաղաքացիական պայմանագիրը»։
Հարգելի գործընկերներ, պարոն Ռուբինյանը, ցավոք, այստեղ չի։ Քյաբաբներից շատ խոսեցին, ընտրակաշառքից առհասարակ։ Ես ուզում եմ մեր իշխանությանը, մեր գործընկերներին հիշեցնել՝ ընտրությունների հաջորդ օրը Նիկոլ Փաշինյանը հայտարարել է, որ ընդդիմությունը 100 տոկոսով ընտրակաշառքով է ձևավորվել, ընդդիմության ձայները 100 տոկոսով ընտրակաշառքի շրջանակներում են։ Հետո արդեն քյաբաբը մտավ շրջանառության մեջ և այլն, և այլն։
Պարոն Ռուբինյանը այստեղ չի։ Պարոն Կարապետյան, Ձեզ եմ ուզում հարցնել։ Ընդունենք, որ ընտրակաշառքով է ձևավորվել այս թևը Ազգային ժողովում։ Քանի՞ քյաբաբ եք տվել ՔՊ-ին, որ պարոն Վարդևանյանին ընտրել են Ազգային ժողովի փոխնախագահ։
Ձեզ կարող եմ հարցնել՝ ՔՊ-ական 13 պատգամավորներին։ Ձեզ քանի՞ քյաբաբ են տվել, որ պարոն Վարդևանյանին ընտրել եք որպես Ազգային ժողովի փոխնախագահ»,- այս մասին հայտարարեց ԱԺ «Հայաստան» խմբակցության պատգամավոր Ագնեսա Խամոյանը։
Մանրամասն՝ տեսանյութում։
