«Հայաստանի Հանրապետության առջև ծառացած են ծանրագույն մարտահրավերներ։ Ես երեկ լսեցի, օրինակ, որ պարոն Ռուբինյանը նույնիսկ խոսում էր այն մասին, թե նույնիսկ այս պահին Ադրբեջանն ու Թուրքիան շարունակում են սպառնալիք մնալ Հայաստանի Հանրապետության համար։ Եվ սա ռացիոնալ դիրքորոշում է։ Ի դեպ, ես նշվածը չէի լսել, կարծես թե, վերջին մի քանի տարվա ընթացքում։
Հետևաբար, արտաքին քաղաքականության և խորհրդարանական դիվանագիտության տեսանկյունից մենք մեծ անելիքներ ունենք։ Ընդհանրապես, Հայաստանի Հանրապետության Ազգային ժողովը պետք է ծառայի Հայաստանի Հանրապետության քաղաքացիներին։ Իսկ մենք տեսնում ենք առաջնային խնդիրը. դա բարեկեցությունն է, դա տարածքային սպառնալիքներն են և մարտահրավերները։
Ընդհանուր առմամբ, մեզ մոտ՝ մեր համոզմունքներում, ոչինչ չի փոխվել. Հայաստանի Հանրապետությանը պետք են փոփոխություններ։ Ձեզանից շատերն արդեն ութ տարուց ավելի է, ինչ իշխանության ներկայացուցիչ են, և կարծում եմ՝ ձեզ մոտ ևս որոշակի ներքին անհանգստություն կլինի, որովհետև երկար իշխանություն լինելն, ի վերջո, լավ տեղ չի տանում․ իսկ մենք տեսել ենք, թե վերջին տարիներին ինչպիսի մարտահրավերներ են եղել»,- ԱԺ իր ելույթում ասաց «Ուժեղ Հայաստան» խմբակցության պատգամավոր Արամ Վարդևանյանը։
Մանրամասն՝ տեսանյութում։
