«Հայաստանում բռնաճնշումները հասել են աննախադեպ մակարդակի, և նման հանձնաժողովի գոյությունն ինքնին կարող է նպաստել այդ բռնաճնշումների թուլացմանը։
Ինքս, փաստաբանական գործունեություն ծավալելիս, առնչվել եմ բազմաթիվ դեպքերի, արձանագրել եմ բազմաթիվ խախտումներ, որոնք տեղի են ունեցել թե՛ ընտրական, թե՛ ոչ ընտրական գործընթացների ընթացքում՝ քաղաքական խմբերի և քաղաքական գործիչների նկատմամբ։ Ես ներգրավված եմ եղել երեք համայնքային ընտրության և մեկ Ազգային ժողովի ընտրության իրավական գործընթացներում և արձանագրել եմ, որ, սկսած Երևանի ավագանու ընտրություններից, այդ խախտումները գնալով խորացել են, իսկ բռնաճնշումները հասել են աննախադեպ մակարդակի։
Թերևս Երևանի ավագանու ընտրությունների ժամանակ արդեն ակնհայտ էին վարչական ռեսուրսի չարաշահման բազմաթիվ դրվագներ։ Ընդհուպ մինչև քարոզարշավի վերջին օրը իշխող ուժի առաջնորդը սպառնալիքներ էր հնչեցնում ընդդիմադիր թեկնածուների հասցեին, սակայն իրավապահ մարմինները որևէ արձագանք չտվեցին դրան», — այս մասին այսօր՝ հուլիսի 14-ին, քաղաքական դրդապատճառներով հետապնդվող անձանց իրավունքների հարցերով հանձնաժողովի առաջին մամուլի ասուլիսի ընթացքում հայտարարեց փաստաբան Սերգեյ Սարգսյանը։
Մանրամասն՝ տեսանյութում։
