Իշխանությունները հերթական անգամ փակել են Գագիկ Ծառուկյանի ՍԵԿՏ-ը։ Այսօր նա ցանկացել է իրագործել նախապես պլանավորած ուղեւորությունը, սակայն օդանավակայանում պարզվել է, որ երկրից դուրս գալ չի կարող։
«Փաստինֆո»-ի տեղեկություններով՝ ԲՀԿ առաջնորդ Գագիկ Ծառուկյանի նկատմամբ նոր քրեական հետապնդում է հարուցվել, ու դրա շրջանակներում փակվել է նրա ելքը՝ ՀՀ-ից։ Նոր հետապնդման մասին տեղեկություն անգամ Գագիկ Ծառուկյանն ինքը չգիտեր, հանկարծակիի է եկել՝ «Զվարթնոց» օդանավակայանում։ Փաստաբանը ևս դեռևս կապ չի հաստատել Ծառուկյանի հետ, տեղեկություն չունի, թե ինչի մասին է խոսքը։
Դատախազությունից «Փաստինֆո»-ի հետ զրույցում հաստատեցին մեր տեղեկությունը՝ նշելով, որ դատախազը հանրային քրեական հետապնդում է հարուցել Գ.Ծ.-ի նկատմամբ՝ Քրեական օրենսգրքի 290-րդ հոդվածի 3-րդ մասի 2-րդ կետով (առանձնապես խոշոր չափերով հարկերից խուսափելը):
Թե երբ է նախաձեռնվել քրեական վարույթը, արդյոք ձերբակալման որոշում կայացվել է, թե ոչ, որ ժամանակաշրջանն է ներառում ենթադրյալ դեպքը՝ դատախազությունից առայժմ չեն մանրամասնում։
