Հանրապետության հրապարակում այսօրվա զինվորական շքերթը բացառապես նախընտրական միջոցառում է, որը կազմակերպվել է հանրությանը ցույց տալու համար, թե իբր իրենք կարողացել են ինչ-որ զենք գնել։ Այս մասին մայիսի 28-ին՝ Հայաստանի Առաջին Հանրապետության օրը, «Սարդարապատ» հուշահամալիրի մոտ լրագրողների հետ զրույցում հայտարարել է «Ուժեղ Հայաստան» կուսակցությունների դաշինքի պատգամավորության թեկնածուների ցուցակը գլխավորող Նարեկ Կարապետյանը։
Նրա գնահատմամբ՝ ներկայիս ղեկավարությունը խորհրդարանական ընտրությունների նախաշեմին պետական և ռազմական ռեսուրսներն օգտագործում է քարոզչական նպատակներով։ Նա ընդգծել է. «Հաջորդ իշխանության օրոք Հայաստանին զենքը նվիրելու են, այն գնվելու է շատ էժան, և երկիրը կունենա անվտանգության լուրջ համակարգ»։ Ընդդիմադիր գործչի խոսքով՝ այժմ երկրի կողմից գնվող սպառազինությունը համատեղելիության լուրջ խնդիրներ ունի։
«Մեր արսենալում անհամապատասխանություն կա, սպառազինության տեսակները միմյանց հետ չեն «խոսում», և դա մեծ խնդիրների կհանգեցնի, սակայն մոտ ժամանակներս ոլորտի մասնագետներն այս հարցն ավելի մանրամասն կներկայացնեն»,- նշել է Կարապետյանը՝ հավելելով, որ «Ուժեղ Հայաստան» դաշինքը մտադիր է ամբողջությամբ վերակառուցել պաշտպանական գնումների համակարգը և խորը դաշնակցային հարաբերությունների վերականգնման հաշվին կառուցել ներդաշնակ ռազմատեխնիկական համալիր։
